CC24Jugn#07 – Chel di Cormons

#07 – Chel di Cormons

Cheste po no mi le sarès mai spietade! Di chel di Cormons, no mi le sarès mai spietade! Cemût? Starnudâi intor a Nevio, un so compagn di corse? Une persone come lui! Cjapâse cussì par une bale di nêf che i veve tirât intor?!! Nancje che Nevio al fos un mus di chei cha a fasin la corsecurte! No si fâs cussì!
Par agnorums chest ca di Cormons lu vin ducj sintût… ha il problema di girarsi, è un buon tiratore, e questo non è bello e vie discorint! E dopo al à sberlave…Gooooool! Al à zirât mieç mont par contânus di chei che a cjapin a pidadis un balon plen di bêçs, ah no, nol è il balon plen di bêçs, a son chei che lu tirin plens di bêçs, ma no impuarte, lui al jere chel che nus contave e ducj noaltris picjâts devant de tv a sintîlu e po sberlâ, ancje nô: dai!, tire!, passe, ce brocul! e moligji un rip! Dut cuinçât, si capis, cun cualchi orco che no nus à mai mancjât, se no ce furlans saressino!
E cumò al ven a disfâ Nevio cun cheste starnudade di faliscjis! Di no crodi!
E no stin dismenteâ cuant che nus à ancje invidâts, simpri chel di Cormons, a lei un toc di bibie par furlan e che ancje lui al à let un toc, un toc plen di nons, di no sai cual libri.
E cumò al ven a fâi cheste partate a cjossul lì, un mus, al sarà ancje un mus, ma cui no isal mus!?
Ah, no, no, jo no pues sopuartâ une tâl! Cumò lu met a puest ben jo! E dibant che l’ostir al vegni a dîmi che chel di Cormons lì, nol è chel lì, ma chel là! Come se chei di Cormons a fossin, ce saio jo, cuissà ce tancj, magari 7208!
No, no, nuie babanadis!
Cumò o tiri fur lis ongulis che lis ai bielis lungjis, cinc cm. ancje se mi les an tajadis vuê di matine. E i sgrafigni la muse a chel di Cormons! Altri che starnudadis!
Se no ce furlan saressio?