CC24Jugn#03 – Ombre grise

#03 – Ombre Grise

Un nûl, che al somee tant a une ghigne cuntune espression signestre, al scurìs il soreli.
Daspò, eco un altri.
Il cîl si ingolfe.
Intun marilamp si intortee tant che il fîl di fier e si struche e al torne fûr grisum.
Al devente une ombre grise cence misure.
Al scree la ploie, simpri plui danade.
E la tiere si sature.
E le aghe e trasborde e e mene vie dut.
Cjasis, mûrs, bestiis, ricuarts, vitis.
E lis stradis e deventin flums.
E lis placis, lâcs.
In chel moment i predicjadôrs a saltin fûr des busis.
A fasin part che e je rivade la fin dal mont.
No, no pues crodi. No vuei murî, jo.
O soi a pene maridade.
O ai la panze sglonfe di vite gnove, che vûl viodilu chel paradîs in tiere tant imprometût!
Le ombre grise mi supe cuntune bocje di jene muarte di fam. E seneose de mê piel delicade tant che scusse dal pierçul.
O respiri a grops. Lis mês narilis e son plenis di polvar bagnât. Mi scjafoi.
La gole e je taiade di un curtis malefic.
Nol passe un fîl di aiar. O cîr il barcon de mê cjamare. Al è blocât.
O ai i polmons di clap. Di bree il pilôr, il stomi, lis gjambis.
La ombre grise mi siere lis pipinis. Il gno frut nol nassarà. Nissun mi cjatarà.
O mûr!
O cuchi lis variazions di colôrs des palpieris.
Antracite, blu viole, naranç, ros simpri plui fuart. O ami, jo, il ros.
O sint la mê anime. La tocji. E je morbide tant che la muse di vilût dal gno cjan.
O vierç i voi. Lu ai devant di me.
Mi fisse cul cjâf pleât a domandâmi ce che al sucêt.
“Sta bon” i dîs.
“Al jere dome un brut sium”.

di ?
#1662

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît