CC24Mai#14 – Classificazions

#14 – Classificazions

Dopo 273 agns, il Laboratori Automatizât (AL), che ducj a clamavin Le Petit, al finì di elaborâ i ultins dâts. Un ultin clic ju trasmetè ae Nilsson Linnaeus. Podopo, il businôr eletric si distudà, lassant Le Petit a polsâ sot la ploie di vierte che e colave cidine tai prâts e tai bosc tor ator.

La Nâf Gjenerazionâl Nilsson Linnaeus e jere partide par Teegarden b 1250 agns prime e si jere comedade intune orbite gjeostazionarie in spiete che AL al classificàs lis formis di vite dal planet. Identificât tant che abitabil, Teegarden b al jere stât ogjet di une spedizion di prime colonizazion.

Par sbarcjâ in sigurece, a bisugnave ingrumâ avonde informazions sul ecosisteme. E cussì, par 273 agns Le Petit e veve classificât di dut: des particulis plui elementârs, fin aes formis di vite plui boconis. Par ognidune e veve inventât un non e inmaneât esperiments. E, di un continui, e veve mandât files cun milions di dâts ae nâf.

Cumò, dopo dut chel timp, la colonizazion e podeve tacâ.

Cuant che l’ordenadôr de Nilsson Linnaeus al cjapà il risultât finâl, cuasi ducj a jerin a durmî. Dome un tecnic, che par câs al passave davant dal schermi dal sisteme, si inecuarzè dal fat. Si fermà par un pôc a viodi chel ultin berdei di pagjinis che par lui no vevin sens. Podopo, al lassà stâ e si metè a zuiâ a un solitari.

Di li a cualchi ore, jevâts, ducj a fevelarin de gnove, ma di straviâts, come se e fos une robe no lôr.

Une setemane dopo, intune assemblee cun ducj i passe 2000 components de nâf, al fo comunicât che la vore di Le Petit e jere finude e chê i files cu la classificazion a saressin stâts logâts intun sisteme periferic, par cui che al voleve tentâ une interpretazion. Nissun al rispuindè, parcè che nissun, ni om, nì inteligjence digjitâl al jere interessât o dome bon di gjavâ fûr alc di chê sdrume cence fin di bytes.

La Nilsson Linnaeus e restà in orbite ancjemò par secui. Nissun al pensà mai di meti pît su Teegarden b. 155, agns dopo, i files de classificazion a forin cancelâts dal dut.

di ?
#1644

2 comments On CC24Mai#14 – Classificazions

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît