CC24Mai#20 – Sex on the rocks

21 – Sex on the rocks

Il puest al jere un di chei bars modernis di citât, tal sotscjale di capanon, parêts grisis e lûs sbaradis dai neons. Industrial style, they say, ancje se probabil che nissun dai clients si fos mai cjalât pardabon ator. Une volte jentrâts, i voi di ducj a restavin incantesemâts denant dal bancon, cercenât di veris di formis e dimensions infinidis, intun esercit di colôrs e savôrs plui o mancul cognossûts e legâi. Flotants scalembris a rindevin i licuits ancjemò plui misteriôs e incuietants.
Sot di dut, lis mans dal barist a misturavin lis essencis cu la gracie e la abilitât di un gaugar, regalant ai aventôrs la esperience uniche di une creazion su misure par lôr.
Une cumbinazion tra il creepy e il luxury che e veve fat cressi la nomee e lis liendis daûr di chel locâl e dal fantat che cun manecis di vilût al servive i siei cocktails fantasiôs, inmagant oms e feminis tant che moscjits dentri dai lavris di une plante carnivare.
Par dîle juste, si cisicave che plui di cualchi volte, sierât il locâl, il fantat si fos inviât in compagnie, juste il timp di regalâ une gnot salvadie. Di li, a nassevin lis ideis pes sôs creazions, compagnadis di salsutis di tocjâ cui crustins fin a lecâsi i dêts.
Plui di cualchidun i veve domandât la ricete di chei golosets, ma la rispueste e jere simpri sute: ingredients segrets, cjapâts sù dopo i moments di gjonde par ricreâ il plasê intai cjâfs dai clients, simpri plui numerôs e apassionâts.
Al fo un scjas par ducj cuant che dal vuê al doman a cjatarin la puarte sierade. Esaminant patês e conservis, i polizai a cjatarin i rescj umans des vitimis che di cualchi mês si intassavin intes listis dai disparîts. Lui no, no lu cjatarin mai. Di cualchi bande dal mont, a disin, un altri industrial bar al jere pront a vierzi lis sôs puartis di misteri.

di Fuguline (Teresine la çuete)
#1650