CC24Mai#15 – Scoltimi ben

#15 – Scoltimi ben

Ce robe dal ostie ti vegnie tal cjâf!

Scolte fiol, cetant che o sin fortunâts.

No nus covente purificâ aghe e aiar come altris. O podìn paiâ pomis e verduris coltivadis tai cjamps nets de penisule antartiche.

Tu tu sês la cuarte gjenerazion da nestre famee libare di maglis gjenetichis lassadis dai agrochimics dal secul XXI (o sin stâts simpri ta chel gruput che al à vût lis risorsis par salvâsi).

Tu rivarâs sigûr ai 120 agns cence che ti coventin orghins artificiâi o di purcits par vuarîmalformazions.

Par altri, il multi-biochip implantât ti permet di visâti di ce che tu vuelis e a ti manten ancje a puest cerviel e emozions.

Tal timp dai antenâts, a dovevin cjapâsi la fadie di imparâ a lei – chel par prin – e daspò interpretâ e disvilupâ ideis. E no dome: ancje par gjoldi une opare di musiche, piture, bal e v.i.

Il biochip in perfete simbiosi ti met concets e sensazions in cjâf e cuarp, e al stimole i sintiments adats. E tu no tu âs di fâ nuie.

Jo o volevi tignîti in cont par continuâ a direzi lis nestris aziendis.

Tu podaressis ancje jessi – par esempli – atlete bionic–olimpic. Nissun ti dinee i bêçs par cambiâ i tiei membris in bionics.

Al e il vantaç, di vivi in chest timp fiol; la tecnologjie e pues fâ dut.

Sì, sì, a son ogni volte plui autocraziis, ma a àn imparât a no metisi ni tai afârs ni cun chei che ju puartin indevant.

Tu podis jessi om, femine, ibrit, ce che tu vuelis.

Ma no! Il signorut al dîs che al vûl molâ dut e zontâsi a chei mats che a vuelin isolâsi e la a colonizâ Marte!

di Matungo
#1645