CC24Mai#11 – Alimentare

#11 – Alimentare

Il curtis insanganât al jere ancjemò poiât su le bree.
L’ispetôr Olmis e il so assistent Uaston lu vevin viodût a pene jentrâts. La esperience no ur mancjave.
Olmis al pontificave ad alte vôs, e Uaston al cjapave note: “Il maçalizi al è stât fat culì. No son dubis. I segnâi a son di ogni bande. La vitime e je stade strissinade. Cjape note, Uaston. E à cirût di pontâ i pîts ma di bant. E chel che lu à copât al à di jessi stât un professionist. Un che al à biel za copât, e al coparà ancjemò. Un killer seriâl, mi vignarès di suponi. Dal moment che la sene dal delit e je compagne di dutis chês altris che o vin za analizât in tal ultin mês. E nol jere di bessôl, il sassin. Si trate di une bande. Almancul in trê o cuatri di lôr. Di sigûr ai àn peât i sghirets cuntune cuarde, par imobilizâle. Cence lassâ nissune pussibilitât di scjampâ. Ce fin orende”.
Uaston, cence fa mot, al jemplave lis pagjinis dal so tacuin. Cidin e diligjent come simpri.
“Somearès un rituâl. Copât, sbudielât e scuartât. E dut al fâs intindi che a son ancjemò in zone. Cjale, Uaston: le puarte da la cantine e je in sfese. E par tiere e je une olme rosse. Tenti pront. Cheste volte ju cjapìn cu li mans tal sac!”.
E cussì e je stade. Cjatarin il sassin pleât sui tocs dal cadavar, daûr a masanâ la cjar ancjemò frescje.
“Al jere un purcit. Fi di une troie” al disè il sassin, cuasi par justificâsi. “Un altri cas di archivià”, al disè l’assistent, sodisfat. “Alimentare, Uaston” al rispuindè Olmes. “Alimentare”.

di Torototele
#1641