CC24Mai#09 – La vecjute tenare

#09 – La vecjute tenare

“A lu viôt ben, siore, al è evident! Di cheste foto si viôt subit il caratar da lis mês agnis. Hilde, le piçule: minude, timide, remissive, sucube di sô sûr grande Dietlinde – cheste – che veve gnerf, e jere comandine. Che cjali cemût che e strenç quei pugnetti lì!”
Lis frutis de foto a somein a doi scheletruts. Lui, invezite, al è penç, falstafian, al somee a Hitchcock: la sô figure imponent e spicave encje tra il public de aste. Al tabaie un furlan cun pesantis cjadençis germanofonis, e cuntune lentece straziant, come se cu la lenghe al pocàs fûr ogni singule silabe dal cuel, une par une.
“Al è chel cafon plen di bêz di purcitut tenerut, chei dal parsut artigjanâl” e veve brundulât la mê femine tra un tornant e chel altri, intant che o lavin al so paîs “i tignivi cussì tant al cuadri di Barbe Tuli”.

“Hilde si jere cjatade un murosut, ma Dietlinde lu veve parât vie. Hilde alore e veve det “I mi fâs muinie” – sin une famee un grump religjôse – ma jê e veve impedît encje chest. “Nô dôs restarin insiemit par simpri, fin a la muart” i diseve, e al sunave come rumôr di clauts suntune bare. E cussì al è stât: a àn vivût par desenis di agns in cheste stesse cjase, intes stanzies sore dal affumicatoio, e le à tratade che nencje Cenerentola, dì dopo dì, messe dopo messe, fin a dopo otante agns. I Unviers, chenti, i son infinîts, crudêi, la int e devente mate!”
Fintremai il rai di soreli che al taie l’aredament tirolês pachian di cheste cjamare al somee partignî a un soreli plui antîc, e dentri di lui il polvar al danze in dissens misteriôs, come la nêf. La mê femine e je spazientide e tamburele i dêts nervosementri: e varès gust di dâi la borse cui bêçs, cjapâ il cuadri e tornâ jù in citât, ma lui, pacjific, al torne a contâ.
“Une dì, pôcs agns fa, a Dietlinde i ven un infart, e sdrume jù tal ingrès di cjase. Hilde, no, Hilde no clame il miedi: si sente dongje di jê, e, cun calme, par oris, soridint, le cjale agonizâ fin cuant che l’ultim fîl di vite si creve. Cençe movi un dêt.
Cuant che il dì dopo jo e gno fradi o sin rivâts, agne Dietlinde e jere già in rigor mortis sot chest cuadri.
“Agne Hilde, ma agne Dietlinde e jè muarte” e jê, felice: “Sigûr! mi cjalave in silenzio cun cheste cjalade che e diseve no stâ clamâ il miedi, no stâ clamâ il miedi che i viôt za le Madone che e ven a cjolimi!” e si jere fate il segn de crôs.
I bêf un tic dal sô tè cjalt – al sà di mandulis.
Al cimie: “Cui metaressial mai in galere une tenare vecjute?”.
La mê femine e poie il té e e sunsure apene: “un delit perfet…”
“Perfet, uh, perfet no sai”m al minimize chel altri, “ma pluitost bon sigûr, masse di lunc. In famee i vin fat simpri miei di cussì. Par esempli, l’arsenic al è plui veloç”.
Il cjâf de mê femine al cole indenant. Jo i sint il cuel a strenzisi.
La ultime robe che i viôt al è lui che al grampe i bêçs da le borse de mê femine.
La ultime robe che i sint al è lui che mi tocje cuntun dêt e al dîs “Mmm, ce bon purcitut tenerut”.

di Nevio
#1639