CC24Mai#05 – Peter

#05 – Peter

Bum! Bum! Vierzêt us prei!
Il clostri ciulant si smole e un omenon cuntune grande crôs rosse e blancje a braçs vierts mi dîs: “Fantat, ce ti sucedial? ”
“Son daûr a fami la fuee, fâmi jentrâ ti prei”.
Mi clamin il “todesc cence storie” par vie che o soi di nissun e in nissun o crôt , cussì o mandi in bestie chei cuatri sfegatâts cortesans dal siôr di Susans .
“Sentiti alore, cjol une tace di brût.”

O restai sîs agns tal “Hospitale” di San Tomâs, cun chei Cavalîrs , o imparai il bon acet pai viandants che dal Nord a passavin culì, e si imbarcjâvin viers Jerusalem par liberâ il Sant Sepulcri.
A cjacaravin di pâs eterne, ma ducj a vevin daûrsi spadis, manariis, lancis… e la crôs di Rome!
I vescui di Vençon e Dartigne però a sburtavin di partî, (ma no di spartî) e fuart de mê zoventût mi intropai ancje jo. Passâts S. Denêl e Voleson, mi butai viers Codroip cirint une barcje a Riverote che jù pal Stele mi menâs a Prissinins e po al mâr. No ûs conti trope int che o viodei: vuerîrs, marcjadants, maçs e biâts cu la sperance de Tiere Promesse.
No ai viodût nissun a preâ, ma tancj a blestemâ chel Crist che a vevin di lâ a salvâ, e mi fâs dûl cheste int sbefade dai caporions, ma chest flum al è une maravee,  se o volti il cjâf, o rivi a viodi lis mês monts, là sù.

Ultime anse dal Stele, un grant prât e la gleseute di Titian, po o soi rivât. Si viôt une fulugne di int di ogni etât in procession viers di jê, e a cjâf une piçule Madone di len, e pôc distant un scjas di berlis, cjavai e spadis slusintis pronts a folpeâ chel trop di biâts pelegrins. Mi va il sanc tal cjâf e o dismonti di bot dal traghet e mi presenti framieç il popul e i bandîts . A braçs spalancâts ur cridi: “Fermaitsi! ” ma… Tunf! Al è il 5 di Mai… e su chel prât al tache a neveâ!
Oms, cjavai e popul si inzenoglin denant di chel misteri. Jo o sparìs sot chel cjandôr, si viôt dome il ros dal gno cûr sbregât di une lance. Se no ai salvât il Crist che mi salvi lui, se al esist!
La fede no si misure in glesie, ma tal bon cûr dai oms.

di Siruc
#1634