CC24Mai#04 – No cumò, no ancjemò

04 – No cumò, no ancjemò

Il so timp al jere finît. Lu sintive tai vues. Ca di pôc al sarès rivât un mudament. Ma no ancjemò!
Ju veve sintûts cuant che a jerin passûts e a crodevin di jessi parons dal mont, ma il vier dal avignî al veve scomençât a mangjâju. A disevin che cui agns si pierdeve il snait, che il cuarp nol vuarive cussì adore, che la ment si pierdeve dentri de sô preson, che i vues a deventavin di savalon e si rompevin di bessôi.
Ur veve ridût in muse. No par lui, cun chês spalis largjis, chês mans fuartis, la vite strete e i moviments elegants di gjat.
No par lui, no ancjemò.
Al scrutinà ator ator, biel cirint alc par judâsi. Si fermà par nasâ l’aiar, cumò al jere sigûr che al sarès tornât dongje ca di pôc. E no veve cjatât nuie par platâsi in chest bûs orent. Parcè jerial vignût in mont, tal mieç di nuie?
I plaseve la citât, dulà che al jere dome di mudâ borc par cumbinâ cence jessi cjapât, par tacâ la sô cjace. E jere stade chê ultime fantate, cui voi scûrs e la bocje rosse ta chê piel blancje che si faseve di marmul plan planchin. E fevelave intant che i gjavave vie la vite, dai siei siums, dal so om che le spietave, de famee che e voleve meti sù cun doi o trê fîs. I veve sierât i voi cun rispiet prin di lassâ colâ il cuarp vueit.
Chest no lu veve fat mai.
Cumò e je cambiade ancje la lûs, no mancje cuasi nuie. No ancjemò!
Al jere rivât tal cret de mont, e maraveât al veve alçât i voi tal cîl. Te citât no si viodin cussì di dongje lis stelis, si jere smenteât che tu crodis che ti vegnin cuintri. Al jere daûr a cjalâlis cence viodi dulà che al meteve i pîts cuant che si jere sintût colâ.
Al batè il cjâf cuintri un clap grandonon e al pierdè i sens. Bielzà sveât, al tentà di movisi ma lis gjambis no i rispuindevin, i vues rots, di savalon. I ultins votcent agns si vevin cjapât la lôr prede. Al veve capît che la crepe te mont e deve viers soreli jevât e che il cricâ dal dì al sarès rivât svelt e spietât par brusâ l’ultin vampîr nostran.
No cumò, no ancjemò!

di Mari de Gnot Nostrane
#1633