CC24Mai#02 – Biel in montvision

#02 – Biel in montvision

Mi vês viodût, nomo? Ducj mi àn viodût, o jeri in montvision. Jerio o no jerio biel? E pazience par biel! No jerio ancje brâf intal fevelâ?
Stant che jo o sai dut sul probleme de energje, mi vevin invidât a fevelânt inte assemblee gjenerâl de ONU. In montvision. E li o ai fat la mê propueste rivoluzionarie sul argoment. Stait a sintî.
Il petroli nol durarà simpri. Il cjarbon al incuine. Il nucleâr di gnove gjenerazion al è tant gnûf che cheste gjenerazion e je vecje prime di sedi gnove.
E alore?
No reste che tornâ a meti in vore la sclavitût.
Sì, sì o vês sintût just, tornìn a meti in vore la sclavitût.
La sclavitût? E ce maniere fâ?
Ah, nuie, al è vonde gjavâur vie la anime ai sclâfs destinâts e e je fate.
Ma ce mût? No si pues gjavâ vie la anime!
E cui aie dit di no! Par secui lis feminis no àn vude la anime e nancje i neris, ce si staie a tornâ a gjavâure vie une altre volte!
Mi àn batût ducj lis mans in montvision! Ducj, scuasi ducj. Jerio o no jerio biel?
Ma, simpri in montvision, al mi capite devant un bocon di neri alt doi metris e mieç! A cjalâlu, nol mi dave la impression che al vignìs a invidâmi a cuatri rais di briscule. E nancje a bevi un tai. Al veve dôs manonis di caterpillar e lis tignive altis.
O ai provât a dîi che nol veve di preocupâsi: inte mê idee rivoluzionarie, sclâfs a saran i blancs e i parons i neris.
Ma nol mi à crodût.
E alore, cumò, se o sês ancjemò sintonizâts su montvision, al è miôr se o distudais! No soi plui cuissà ce biel!

di Ippogrifo
#1631