CC24Mai#01 – Tes sachetis dal dispresit

#01 – Tes sachetis dal dispresit

Noaltris ju cjolevin pal cûl, tal imprin.
E daspò ju vevin sierâts inte sachete dal dispresit, par smenteâsi de lôr esistence.
No-vax, no green-pass… Aromai tu ju viodevis dome intai coments sui social, cuant che al murive un zovin, di malatie, o a colp, cu lis lôr frasis tristis e alusivis, cence pudôr. L’infet al jere lât vie, lis robis si vevin comedadis, plui o mancul cence lassâ sdrassis. A planc a planc, in chei doi trê agns, il mont al veve tornât a messedâ stupits e mancul stupits (i inteligjents, aromai…), cence che si rivàs a dicerni la partignince a chest o chel emisferi. Ma ta chei prins mês dal 2024, cuant che i muarts a scomençarin a no murî dal dut, a forin sul pont di vê la lôr rivincite.
I muarts a si movevin, si strissinavin, un procès biologjic impussibil di proviodi: se a vignivin nudrîts vie flebo, si ralentave la putrefazion fin a fermâle. Cualchidun al rivave ancjemò a fevelâ, ancje se dome cun cualchi silabe soflade fûr a stent.
«Soi jo, Pieri, mi vûstu ben?»
«Ssss», al rispuindeve il muart. E al bastave.
I prins studis, fats di presse, ur devin reson e chei là.
Chei che a murivin cence murî, a jerin ducj vacinâts.
Chei che a murivin e vonde no.
E in curt, se a jerin vacinâts, i malâts a vignivin puartâts vie dai ospedâi, a murî a cjase. E tai coments sui social cumò, lis sachetis dal dispresit si jemplavin di chei altris, chei mancul stupits.
«Ce biel deventâ cadavars che a si strissinin, no mo?»
«Veso volût il grafene? Us sta ben!»
«No us vevino visât che al jere un siero?»
Ma al durà pôc.
La sience e intivâ in pocjis setemanis che il muart al jere simpri muart: e jere dome une cuistion di gnerfs e une sorte di mumificazion transitorie, daspò si tornave a fraidî come simpri. La vacine, clare, e fo metude fûr leç, ancje se aromai nissun le varès plui domandade. Ma nol fo cussì.
Cundut dai controi e dai diviets, al tacâ il cuintribant.
Pfizer, Moderna e soredut Astrazeneca a costavin ancje dîs mil euros sul marcjât neri. Da rest… i no-vax a jerin disposcj a paiâ ancje il dopli, par vacinâsi.

di Vercingetorix
#1630