CC24Avrîl#25 – For Your Eyes Only, in onôr di Ian Fleming

#25 – For Your Eyes Only, in onôr di Ian Fleming

Dut al scomençà cun chel sun alucinant che al interompè la nestre
sieste pomeridiane. Un sunôr di disperazion, di dolôr, o forsit … di muart?
Un altri omicidi?
“Ma cui ise che e à fat un brut sium?”, domandà 001.
“Si durmive tan ben tal soreli…!” afermà 002.
“Par me al è il solit frut salvadi!”, comentà 003.
“Ma nooo, cjalait ben, al è alc di strani in tal prât.” concludè 004.
In efiet su la jerbe si viodeve un cuarp neri che, dopo di un ultin suston,
al veve finît di movisi.
O tacarin a smirâ tor ator a la ricercje di un indizi riveladôr.
Ve là un sfruiâ suspiet. E une ombre che si platave daûr del saût.
Si slungjarin un pôc a dret e un pôc a stuart. O faserin fûr indenant. O
osservarin tor ator.
E jere stade di gnûf jè, simpri jè, chê disgraciade di Medee.
E veve colpît ancjemo, come la Istât passade. Un altri omicidi perfet.
“Ce podino fâ noaltris?” a diserin in côr.
La gjate, tornade a cjoli la lisierte muarte te bocje, e jessè de ombrene,
e sfilà cun aiar di sfide denant dal nestri barcon e nus sgnaulà: “Mandi,
orchideis, ce veiso di cjalâ?”

di Francesca Giorgetti (Daisy)
#1623

1 comment