Pidiments!

E insome, e mancjave dome chê a la serade di Contecurte a Codroip!
“O ai lassât i sfueis cu lis contis e i libris ta chê altre machine! O vevi dut tal bagai de Oldsmobile ma o soi vignût cu la DeLorean e cumò al è masse tart. Ma tu tu podaressis improvisâ alc.”
Cussì mi dîs Rafaêl.
E jo, par mê fortune, o vevi cun me une copie di ‘Scûr di Lune’ e cussì i ai dit che o podevi lei lis mês contis. Lui al à dit di sì. Ce ben! O sarès stât protagonist de serade. Ma invezit, viert il libri, o noti la stampe falade: a jerin dome grafics su la agriculture furlane.
Alore a Rafaêl i ai dit che o varès cirût lis contis diretementri sul smartphone. Intant, trê zovins dal public, vistûts a contadin vie e di sigûr furlans di marilenghe, si jerin stufâts e a jerin lâts fûr de sale…
“Ve che o vin pierdût i pôcs zovins, Rafaêl; a restin dome vielis e boomers!”
“Moviti, tache! Bute fûr la prime conte che tu cjatis!”
Ma no jere finide: e jere pocje lûs, ma no varès vût di preocupâmi di chel… il schermi al jere luminôs e il smartphone, come par meracul, al jere deventât grant il dopli. Dopo mi soi fat meti il microfon, che prime nol jere. Mi soi fat spostâ, vint un toc di mûr che o vevi devant. O cirivi di no cjalâ une mê ex che e jere juste devant di me e mi vergognavi.
“Tache! Tache!”
E no rivavi a cjatâ lis contis su Google. Mi vignivin fûr letaris in ebraic: aleph, betel, gamel…
Podopo o ai sintût un rumôr potent, come di martieladis!
TU TU TU TU TU TU TU TU!!!!!!!

Par fortune che al jere dome un brut insium!
Tal bearç gno cugnât al provave la vecje ‘Indian’ par lâ al motoraduno di Vierte a Percût.
Gno cugnât mi veve sveât, metint fin al classic insium dai pidiments.
Ju varês fats ancje voaltris.
Mi racomandi, vignît a la serade di Contecurte, ai 22 di Març a Codroip.
O soi convint che no saran pidiments.

di Checo Tam
#1576

1 comment