CC24Març#13 – L’umit ti cope

#13 – L’umit ti cope

Soi une sirene e mi soi stufade di stâ sot aghe.
No, nol è just… Stufade al à un che di sopuartabil. Tu sês stuf, ma tu vas indenant a stâ te tô condizion, magari ancjemò a lunc. No, no, par nuie. Par me nol è cussì. Jo, di stâ sot aghe, mi soi propite rote i coions! Si fâs par mût di dî, clare, par fâus capî, che o savês benon che no ju ài.
La piês robe, dut câs, al è l’umit. L’umit ti cope, plui dal cjalt, lu san ducj, no lu disino simpri i vielis? Dute chê condense, fumate che no ti permet nancje di viodi fûr, mi fâs lâ in bestie. E po, si no altri, mi sint a fraidî, che mi sfanti, che mi cres il muscli intor. E di prionte, fossio te aghe nete. Jesus… a stâ ferme achì tu viodis passâ denant dai voi di ogni. Scussis, sacuts, façolets, butiliis, maglis di robe onte e di cragne che no savarès nancje dî ce che a son. E chei di chenti, a dîle dute, non son mighe cetant simpatics? Une trute mi à sbitiât in muse, un bisat mi à zirât ator ator cul so slichignotâ e un gjambar, parfin, al cirive di rimpinâsi sù par sot, par fâsi la tane. I varès sbarât, altri che jessi sirene!
Ma po, di trop isal che soi ca sot?  E soredut, trop podarâio lâ indenant a smalitâ i miei revocs celestins prin di sfantâmi e deventâ invisibile, destinade a restâ sapulide tes corints di chest flum? E bon… sì, ce isal di strani. Soi une sirene intun flum. E alore? Us parial il câs di coionâmi? Coionait chei doi carabinîrs achì sot di me, totolòs ancje lôr, nancje bogns di fâ un inseguiment come che si devi!

di Vercingetorix
#1580