CC24Març#25 – Domo

#25 – Domo

Pe sô malatie respiratorie i dotôrs no i vevin mai permetût di movisi in puescj masse infolcjâts. I lassavin dome torzeonâ in paîs piçui, no masse lontans, a pat che al sedi par pôcs minûts. I pareve di jessi a stâ intune sorte di domo virtuâl.

A ben che il lusôr des grandis citâts lu veve pardabon simpri atrat, al veve simpri rispietât chê regule.

Intai raduns familiârs segnats sul lunari almancul trê voltis par an, Pasche, Nadâl e Sante Scugne, i cusins che a vignivin de metropoli a someavin di jessi colâts di une mission de N.A.S.A. I lôr vistîts, i lôr mûts di fâ e di dî, i vevin dât simpri pardabon la idee che a fossin a stâ intune altre galassie, a ben che a jerin dome 400 chilometris di distance.

Intal so complean numar 15 al decidè di rompi la restrizion che i dotôrs e i siei gjenitôrs i vevin imponût sin da piçul. Chê zornade si sveà a buinore e al cjapà un tren viers la capitâl a ducj i cost, cence fermâsi a valutâ consecuencis.
Tal rivâ la agjitazion e il baticûr i fasevin di benzine, par lâ indevant.

La prime sorprese e fo la maree umane che lu menà pe spale tant che un pes fûr de stazion.
Subit daspò al provà a dicerni la sene devant dai siei voi. Al tentà di sclarî tal so cjâf cemût che si faseve a stâ intun puest dulà che la lote pal spazi e jere une forme da movisi. Si po, al someave un zuc dulà che, in seconts, tu vevis di cjapâ un puest par moviti intune altre casele che e scugnive prime svuedâsi.

Par completâ il turbin di confusion subit daspò lu involuçà une aure une vore strane, lu cjapà sù un sintiment di isolament. Cemût si podevial vê chê percezion intun puest straplen di int?
In chê sdrume di confusion l´aiar par respirâ al deventà un ben ogni moment plui scjars fin che al scomençà a colâ in svaniment.

La ultime robe che al ricuarde di chê maledete metropoli, che pardabon al veve desiderât par cetant timp, al jere un domo di plastiche che i meterin te muse cun ossigjen, te ambulance par puartâlu indaûr, tal so piçul paîs.

di 32
#1592