CC24Març#17 – Tal blu piturât di blu

#17 – Tal blu piturât di blu

I zirave il cjâf. E faseve i salts di contentece tal spazi. E rideve a crepepanze! E balave e si smenave tra planets e asteroits, e faseve fieste tra galassiis e busis neris e celebrave la grande vitorie finâl saltant tra une stele e une altre.

E jere rivade. Dopo milenis di tentatîfs lâts di rive jù, Jesù, Buddha, Gandhi, Martin Luther King e ancje Cjâfs di Stât e di Guvier a vevin ducj falît in maniere vergognose.

E jere rivade jê invezite. Cun la uniche grande e insostituibile arme dal bon sens.

E jere rivade jê a vinci. A negoziâ cun dutis lis potencis mondialis e al fin a puartâ la pâs te Tiere. A transformâ dutis lis armis dal mont in mangjâ e libris, ducj i cjararmâts in corieris e ambulancis eletrichis, dutis lis casermis in scuelis e ospedâi de avanvuardie, duticj i esercits in personâl medic e scolastic preparât e motivât.

“Mai plui vuere!”, e trionfave la Imperadore de pâs, la Imperadore planetarie, par simpri vitoriose.

E e rideve e danzave e faseve fieste. Tal blu piturât di blu.

di Francesca Giorgetti (Daisy)
#1584

1 comment