CC24Fevrâr#18 – Cence cjoli la ombrene

#18 – Cence cjoli la ombrene

“La ploie e ven jù cence fermâsi pocant sul veri dal barcon”.
No, masse banâl.
“Lis gotis di ploie a son lagrimis di un Diu lontan”.
No, masse metafisic.
“Ogni gote di ploie che e rive par tiere i dà un colp in plui ae mê voie di vivi za scjarse”.
No, masse depressîf.
La ploie e colave jù intant che al scriveve (o almancul al provave a fâlu) e il rumôr des gotis sul veri al compagnave chel iregolâr dai dêts su la tastiere dal pc. Doi ritmis diferents e contemporanis che a segnavin il timp di chel dopomisdì fasintlu a tocuts minuscui: la ploie Achil e il pc la copasse, impegnâts a cori insiemi ma su dôs liniis di timp che no si incuintrin.
Al voleve scrivi une letare a Giada par fâi capî cemût che al si sintive, e i sarès plasût vierzi cu la ploie par introdusi il fat che Giada i mancjave, e tant, e nol rivave plui a stâ cence di jê.
Di cuant che lu veve lassât si sintive malon. Nol jere dome il fat di jessi restât bessôl, ma di no vê rivât a fâ miôr, di no jessi stât avonde.
Si de fuarce bevint ancjemò un got di sgnape. Il cjalt tal gargat i de la ispirazion.
“La ploie e je une forme di conession tra cîl e tiere. La aghe, nudriment primari e assolût di plantis e nemâi, e cole dal cîl in forme di ploie par nudrînus, ma nus ricuarde ancje che al è alc parsore di nô che no vin mai controlât. Nus ricuarde che dut ce che o viodìn al ven di cualchi bande e di cualchi bande al larà, come la ploie che e rive dal cîl e dopo e tornarà a jessi aiar”.
Al sintì un ton lontan: la ploie e deventave burlaç.
I rivà dal zardin il rumôr fuart e continui dal bati de ploie su la lamiere de legnarie. Il cuarp lu veve lassât lì. Che lu clamàs?
“Giada, amôr me unic e infinît, fevelant di ploie o volevi dîti chest: no dut si controle, no dut si capìs, ma la vite e je cicliche. Si tornarìn a viodi intune altre forme, tant che aghe o aiar. Ti amarai par simpri”.
Propit in chê, il rumôr di une sirene in svicinament al sbusà il burlaç.
Al stampà il sfuei e al lè viers la legnarie cence cjoli l’ombrene.