CC24Fevrâr#01 – La lûs

#01 – La lûs

E je plui di une ore che o voi daûr di chê lûs. Usgnot e je une fumate cussì penze che la mê piçule veture e scugne restâ tacade a chel grant machinon che al cor devant.
Il ferâl “retronebbia” di chel automobilist mi fâs di vuide; sperìn ancjemò par un pôc, almancul fin a la beorcje par Sedean: no pues mancjâ a la riunion.
O soi ancjemò zovine ma mi àn bielzà dât une incarghe impuartante come dirigjente aziendâl.
Ce che o fasìn? O sin une des fabrichis plui impuartantis di cjar sintetiche dal Friûl. Cumò che il guvier al è cambiât o vin vût il vie libare par produsile. A disi la veretât a jerin za pronts di prime: si imagjinavin che lis robis a saressin cambiadis e o vin puartât indenant il lavôr.
Uff, cheste fumate cumò mi samee ancjemò plui penze di prime, tant che no rivi nancje a distingui lis lusutis rossis di chel devant di me ma dome il retronebbia blanc. Mi samee une vore strani parcè che lu viôt simpri plui grant. No sai se e je une mê alucinazion ma lu viôt che al cres di diametri, ancjemò, ancjemò e ancjemò.

Cumò mi sint lizere, simpri di plui.
Simpri di plui.
Jo mi cjati intune sorte di galarie scure e devant di me al è il grant cercli di lûs.
No soi di bessole: al è cualchidun altri dongje di me a compagnâmi. Par un moment o ai sintût un rumôr a ûs un sgurlament, come se o ves dongje des alis in moviment.
Cumò devant di me al è un om vistût di blanc. Mi spiete. Al è dal dut inneât inte lûs. Ma al è strani che jo o savedi che al è un om pûr no rivant a distingui i lineaments de sô muse.
Al à di jessimi capitât alc su la strade ma no mi visi ben. Ve, cumò o ai un ricuart che mi ven sù, al devente cuasi clâr ma un moment dopo al torne a distudâsi. A pensâ ben, li de beorcje par Sedean o ai di vê sintût un ton. Al jere fuart.

GNOVIS DAL FRÎUL
SCUINTRI FATÂL SU LA STRADE PROVINCIÂL
LA FUMATE E À ÇONCJÂT UNE ALTRE VITE

di Derna
#1538