CC24Zenâr#15 – Boboros

#15 – Boboros

Jê e cjamine par un troi larc e curât e il bosc che al è ator al è zovin, ben tignût. La lûs i rive tant che une musiche e i clipe la piel. Il bosc al è chel di simpri, il troi al è chel che e cognòs.
In chel, a colp, e intive une vôs mai sintude che, i pâr, le clame. O forsit no ma, dutcâs e jeve i voi par cirî la linie, la direzion, il dulà. Cussì si inecuarç che il troi, che il bosc, che l’ator no son plui chei. Dut nol è chel e ce che e capìs al è un grop, un berdei cence forme che al somee cressi par ogni respîr.
No à ancjemò pôre, cussì e domande:
“Cui esal?”
E dal penç dal berdei, une vôs e jes cuiete:
“Vuê no ài un non!”
E jê, sgarfant cui voi:
“Dut al è nons, dut al è clauts!”
Par un pôc al è dome un sbisiâ tes fueis. E, dopo, ancjemò chê vôs:
“Il non al è misure, il non al è distance. E tu sâstu cuale che e je?”
Jê e crôt di savêle, chê misure, chê distance. E crôt di vê imparât ogni non e ogni claut par fermâlu. Ma, intant, chel berdei cence forme si fâs plui penç e plui dongje e jê si sint gafâ di une fumate scure che le cjape tai voi, te bocje, tai pinsîrs. E cîr il non, crodint che a induvinâlu si salvarès. Ma il non no i ven: ni chel di ce che al è li ator, ni chel di ogni altre persone o cjosse. E volarès cori, volarès provâ a scjampâ, ma dut al è, aromai, abìs.
Alore si siere, pognete, spietant che dut al finissi. Ma nol finìs, nol finirà mai e cussì, ferme, e capìs cemût che si devente len, che si devente piere. Cemût che si devente eternitât tremende.

di Stiefin Morat (Catine la Nere)
#1522