Conte misteriose (18): Ostariis

Di Glenn nol è restât dabon nuie, Glenn nol à scrit mai une note, o pensai, impen Wertheimer, al incontrari di Glenn, al à scrit cence polse par agns, par decenis. Massime su Glenn o cjatarai diviersis robis interessantis, o pensai, mo chest mo chel, e in ogni câs o cjatarai plui di cualchi viaç alc su noaltris trê, sul timp dai nestri studis, sui nestris mestris, sul nestri disvilup e su la evoluzion dal marimont, cussì o pensai impins te ostarie intant che o cjalavi traviers il barcon de cusine cence rivâ a intivâ nuie, par vie che lis lastris a jerin neris di cragne. In cheste cusine contose si fâs di mangjâ, o pensai. In Austrie lis ostariis a son dutis sporcjis cragnosis e dabon stomeosis, o pensai, al è da râr che in une di chestis ostariis si rivedi a vê une tavaie nete su la taule, un tavaiuç di stofe nancje a dîlu, là che in Svuizare al è pardut un fat ordenari. In Svuizare la plui piçule ostarie e je monde e plasevul, impen ca di nô in Austrie ancje i albiercs a son sporcs e stomeôs. Par no dî di ce che al è tes cjamaris! o pensai. Dispès ur dan dome une stirade ai linzûi a pene doprâts di un client intant che un altri al è daûr a rivâ, che no da râr al cjate tal lavandin çufs di cjavei di chel prin. Lis ostariis austriachis mi àn simpri fat stomi, o pensai. Plats e tacis no son nets e, a cjalâ ben, lis possadis a son dibot simpri sporcjis. Pûr, Wertheimer al vignive une vore dispès in cheste ostarie, almancul une volte in dì o vuei viodi cualchidun, al diseve, magari ancje dome cheste parone contose, malmetude e trascurade.
Intant che o voglavi intor tal ambient, o pensai di copâmi, aromai che Glenn al è muart e Wertheimer si à copât, o pensai. Ancje Glenn al veve simpri vût teme dal mutriç des ostariis austriachis, al veve pôre di cjapâsi une malatie mortâl in chestis ostariis austriachis che ur dan simpri pôc aiar o fintremai no ur al dan piç. Pardavêr tes nestris ostariis une vore di clients si cjapin une malatie mortâl, i ostîrs no vierzin mai i barcons nancje di Istât, e cussì l’umit si insede tai mûrs par in eterni.
Mi tirai dongje dal barcon de cusine di cualchi pas, ben savint denant trat e disintmi dentri di me, no tu viodarâs mai nuie traviers il barcon de cusine, par vie che, come che o ai dit, al jere un barcon sporcjissim di insom fin da pît. Ducj i barcons des cusinis austriachis a son sporcjissims e traviers di lôr no si viôt nuie, e chest, o pensai, al è, che ben si intint, un grandissim vantaç, parcè se cussì nol fos si cjalarès a dret dentri dal disastri, te babilonie soce des cusinis austriachis. Cussì o tornai indaûr di chei pas che o vevi fat cuintri il barcon de cusine e o restai impins tal stes puest che o jeri stât dut chel timp. Glenn al è muart, o pensai, tal moment miôr par lui, impen Wertheimer no si à copât tal moment miôr par lui, cui che si cjol la vite nol se cjol mai tal moment miôr par lui, là che la cussì clamade muart naturâl e rive simpri tal moment miôr.

Estrat di une opare misteriose… di induvinâ tai coments
Voltade par furlan di Gianluca Franco