E je une vecje fotografie fruiade e inzalide dal timp. Di sigûr, chei che le cjalin no san nuie di jê, ni di dute chê int che si intraviôt te imagjin. Come al solit tal daûr no si lei ni datis ni nons, nuie.
Cuant che il fotograf al molà la lampade nus fasè cimiâ e cumò o stenti a ricognossimi in te file dai zovenuts sentâts, no sai se dovût a la emozion di vê cheste imagjin tes mês mans daspò di tant timp, o forsit dovût al pas dal stes.
Fermant la cjalade su di jê mi nudrìs di vite come cuant co jeri frut, o ricognòs i nonos, lui cu lis mostacjs ae “Vittorio”, rapresentant il tronc ben inlidrisât de stirpe, che cence dubi e continuarà a butulâ, a man a man che lis gnovis ramis a laran cirint il lôr spazi tai timps a divignî.
Dongje dal vieli, la none, une anziane cun des lungjis cotulis e une morbide cjavelade racuelte a mo di cocon, une figure che e mostre la impuartance matriarcjâl che e à vût dentri dal grup. La cjalade gjenerâl viers l’obietîf e ferme par simpri chel istant di vite.
I vielis no ridin come nô mularie, a restin solens e imobii, probabilmentri sbarlufîts e rispietôs viers chel rivoluzionari argagn, cun la capacitât di imortalâ chel fuint moment, par daspò trasmetule intun futûr, che dal sigûr no rivaran a cognossilu.
Cence dubi, in dute cheste acurade e studiade senografie si percepìs la juste severitât di cualchidun che al à savût incuadrâ la sene dentri di une lint.
Tancj di lôr aromai no son plui, a son dome ricuart e nostalgjiis. O podaressin dome dî che e je une imagjin di vite, ormai tant lontane, ma al stes timp vicine, fissade par simpri in chel atim e in chê pose.
E dal plui piçul al plui grant, ognidun cu la sô storie platade in spiete che al rivàs il moment just par podê insumiâsi cun l’amôr di cheste famee, che si nudrive di vite come in cheste fotografie colôr sepe.
di Galliano di Buenos Aires
#1***
