E come che o savês, o lin indenant a meti su cjarte cualchi nestre conte, tirade fûr dal camarin des nestris mil e passe storiis (prest lu savarin cun sigurece, tropis) in gracie dal cjantonut che nus regale la Panarie, che al è simpri biel e colorât, e plen di snait.
O miôr, chest colp nol è tant plen di snait, stant che l’Ostîr al à decidut di lâ in teme di Sierade e burî fûr de cantine cualchi conte maluseriose. Ve alore chi sot che us lassìn la jentrade dal Ostîr e ca parsore il so dissen ispirât ae conte dal Checo. Chês altris contis a son di Galian, di Milio e di Nello. E se ancje voaltris o vês voie di fâ un salt intal 2015 e tornâ a leilis, doprai chel biel boton “Cerca” che al funzione une vore ben e al cjate dut
O ancje la pagjine cun Dutis lis contis che e je simpri plui maraveose.
Ma… ce isal chest mês su la Panarie, pene jessude? Di ogni, come par solit. O vin un articul su lis gnovis prospetivîs in Cjargne, un su la Esposizion Regjonâl dal 1903, un storic su Aquilee e un ancjetant storic sul cimitieri dismetût di Castoia. E po ancje un speciâl une vore plen di detai su Pasolin e altris tocs su la piture (Enrico Miani), la leterature (Svevo), une glesiute a Feagne, lis rubrichis sui libris… e insome. Se o volês comprâlu o abonâsi ai 4 numars dal prossin an (che al varà ancjemò dentri il nestri cjantonut des contis, che propit cumò l’Ostîr al tache a sielzi). Us lassin chi sot dutis lis indicazions.
