CorseCurteDicembar#12 – Un piçul malstâ

#12 – Un piçul malstâ

Giulia si piert su lis pistis blancjis. Ogni moviment dai braçs e des gjambis, zimul o contrari rispiet a chel prime, al distire i siei pinsîrs. E devente simpri plui brave, Giulia, aromai no va plui jù dome a spazzaneve, come dôs setemanis indaûr. Il timp però al è par scjadi. Tal cjantonut di drete, cuasit platât, Giulia e smicje il timer: a mancjin 20 seconts.

La ultime nêf e po finît, e je ore di gjavâsi il casc simulatôr. La palestre e je avonde plene, segn che di int cuntun pôçs di bêçs a ’nd è ancjemò. Schiâ tal 2042 al è ancjemò un status symbol, ancje se cumò che di nêf no ’nd è plui al podarès costâ cetant di mancul.

Giulia e jes de palestre. Superant la baridure interne-esterne si sint colâ intor l’element G, il gas protetîf che di za doi mês al è deventât obligatori ae jessude di ducj i locâi. Aromai cuasi dutis lis cjasis a son indotadis di erogatôrs automatics. Giulia, che cun chel non anticuât si sint dispes savie come une none, e jere restade scaturide pes polemichis vignudis fûr su la obligatorietât dal element G. Par jê e jere une buine idee e vonde, viodût che e protezeve la int dai tumôrs de piel e dal 57% dai patogjens presints tal ambient. Une percentuâl di incressi, sigûr, ma di alc bisugne partî, e pense.

E sielç di tornâ cjase a pît, cence spietâ la navete – plui che altri no rive a fâ funzionâ il servizi di gjeolocalizazion colegât cu la aziende di traspuarts. A son 44 grâts e il soreli al bat, ma par fortune l’element G al rive a schermâ dal cjalt garantint une diference di 10 grâts. Propit une grande invenzion, e pense, une des miôr tra chês vignudis fûr dopo de ultime pandemie. Clâr che dut al à un cost, e pazience se par vê l’element G o vin scugnût rinunziâ aes monts. La voglade, a nord, si scuintre cuntun orizont sbudielât, intant che Giulia e sint un piçul malstâ. Lis Alps di une volte, chês des foto e de simulazion, no son plui. Al lôr puest, dome vanzidums di materie in disordin. Par cjatâ l’element G bisugne cirîlu, e pense Giulia, respirant a font.