CorseCurte – La classifiche di Otubar

O sin rivâts ancje chest mês a dâi fûr e vele ca, la classifiche dal mês di Otubar cundut ce che si puarte daûr.

Il teme al jere pôre, e al è biel viodi che al è stât intindût in tantis manieris. Ma viodìn di no pierdisi in cjacaris e anìn drets tal dûr.

E nuie… aromai al pâr che il Lupusinfabula al vedi pardabon metût il turbo e al poiè jù une altre conte di raze che e vinç la zornade e si puarte a cjase i vincj ponts, in gracie ancje dal jutori dal public, che lu à votât par secont. La uniche scuadre che e pâr restâi te sdrasse al è il Cjicechepicjedispicjelacite, che cul so secont pues e met in cassefuart il prin puest e aromai di propon come prime candidade a vinci la competizion, ancje se a mancjin beromai doi mês.

Ma il fat che dut al pues sucedi nus al fasìn viodi altris dôs scuadris, tal biel e tal brut. Il Real Cocâl, infati, al tire il flate e cirint une interpretazion alternative al teme al piert il podi. Il Borussia Dordul, invezit, al à cjapât un pas costant e al ten daûr chei altris, fûr che il Volketitrei-Liga, che al met il nâs pe prime volte intal podi.

E ancje tal mieç de classifiche lis robis a mudin: il Barba Pisul Stentadizza nol presente la conte e i aversaris a profitin. Insome.. no son cambiadis grandis robis, ma ancje chest mês al è cui che si è gjavât sodisfazions e cui che al à di uçâ il curtìs su la muele par recuperâ une prestazion negative.

E aromai o vin in vore ancje une altre sfide: cui rivaraial a tignî bot par dut l’an scrivint une conte al mês? A mancjin dome doi, e je vere, ma o viodin dai partecipants che al è simpri plui dificil tignî bot. Lu podês viodi chi sot de classifiche gjenerâl.

Lu viodês ancje voaltris, no son in tancj che a àn mandât une conte ogni mês. E jenfri chei o vin di fâ un batimans a int come il Potonzio o il Fi di Marie dal Cafè che cundut che a no i interessi la classifiche no mancjin di dâ il lôr contribût ae competizion.

Ma de classifiche ce dî? Che si scurte! Vere che il Cjicechepicjedispicjelacite al èâr no ve pôre di nissun, ma il Volketitrei-Liga, l’Atletic Gjatui e il Borussia Dordul a somein propit no vê voie di molâ, Cence contâ il Lupusinfabula che aromai al è come une fusete… Lis robis si fasin pardabon stiçosis. E contait ancje che a mieze classifiche e je int che nus regale pardabon bielis contis.

E il fantacorsecurte?

Ben po, no crodarês, ma achì lis robis a son compagnis in maniere incredibile: i prins trê in classifiche a àn imbrocade la miôr conte dal trop e a son restâts a pâr. Se zuin dute intes ultimis dôs zornadis… e al sarà ce ridi.

E cun cheste us saludìn e o restìn in spiete des contis dal mês di novembar, a teme… cricâ dì!