Fantastic Argjentin: a torzeon pes creaturis

I popui origjinaris a àn creât lis lôr liendis cun vampîrs, sirenis, orcui, oms lôfs e parfin un fantin cence cjâf, jenfri une schirie di tancj altris.
Anìn a torzeon jenfri chescj vivarôs personaçs.

FANTASIMIS
Lis contis di fantasimis a son presints par solit in dutis lis culturis. Al è il câs des “Almas perdidas” (animis pierdudis) che a àn nons e formis diferencj a secont di etniis e regjons.
A Santiago del Estero a son descritis come feminis crotis cun cjavei luncs che a vain cence fin tai trois intant che si lagnin dai lôr amôrs incentuôs. Tal Nord e jê la “Almita” (piçule anime) che e torzee pes monts e e salte fûr di gnot, in particolâr te Gnot dai Muarts.
Su chest teme a son altris liendis come chê de “La Llorona” (La Plaiote) e “la Viuda” (La Vedue) che a son di regjons diviersis, ma une e je simpri vistude di blanc e chê altre simpri di neri.

NANUI
“Anchimalèn, Bachila, Delgadìn, Imbunche, El Pombero” e v.i.
A esistin versions diferentis, cualchidune dongje des liendis che a puartarin i colonizadôrs cun lôr, altris cuntune ispirazion locâl,tant che “Anchimalèn o Cherufe”. Chest ultin al è un mît araucan, al à la forme de nanul-frutin de scune che si pues mudâ intune sorte di fûc che al svole e che al si viôt tai trois o tai arbui, ma ancje parsore dai têts des cjasis.
A Salta e a Tucuman si lu clame “El Bachila”, e si ben che si lu viôt vistût cuntune schirie di induments diferencj al à simpri un cjapiel tal cjâf e al fâs tristeriis, come chês di trai claps e meti in disordin lis cjasis.
Tes Valles Calchaquies, “Delgadìn” al puarte il so flaut di vues di condor e si plate jenfri i arbui dulà che al salte fûr par protezi i animâi o par cirî une fantate. Il “Imbunche”, invezit, al è un araucan di aspiet displasevul che al pâr jessi un frut robât dai strions tai prins mês de vite che al è deventât un lôr sotan.
Ma se al è un nanul che si à fat cognossi une vore chel al è il “Pombero”, brut, neri e pelôs, che al puarte un gran cjapiel. Al è un protetôr dai uciei e al vîf dentri dai troncs dai arbui e dilunc la mirie, al cîr i frutins che a olsin cjaçâ uciei, par metiur pôre.
A Chaco a sigurin che al veve preference dal sanc dai frutins e che ju tache sù daspò di vêjus svuedâts. Come chês altris figuris mitologjichis, al lasse che la lussurie lu cjapi e al fâs visite aes feminis maridadis cuant che i oms a son fûr a bevi, o ancje a chês no maridadis e al è ancje bon de tirâ claps ai morôs.
Un altri personaç popolâr al è il “Sombrerudo” (Il Cjapielat), che al vîf a Catamarca e che al gjolt intal bati i zovins intant che a fasin la mirie e di cucâ lis frutatis dilunc la gnot.
A Mesopotamia si dîs che “Yasì-Yaterè” al è biel, biont, cun voi di colôr blu, muscolâr e barbon e che al scjavace i cjamps di gnot, crot, cuntun cjapiel di paie e un baston di aur, che al à dentri il so podê.
I araucans a fevelin dai “Tinguiritas”, nanui dai boscs, che a saressin une sorte di minadôrs, tant che i nanui di Blancjenêf, che a vivevin tes monts.

STRIIS
Lis striis a son une vore sparniçadis. Tal Nord dal paîs, si rispiete la concezion europeane e a vegnin pituradis tant che feminis avonde vieris, cun la piel ingrispade, bocje cence dincj, un nâs sfilât e plen di riçûi.
Al è clâr che, di solit, a svolin suntune scove.

EL CHILLUDO (YETI ARGJENTIN)
Altri nol è che l’om des nêfs.

EL LOBIZON

La liende dal om lôf e je universâl. In Argjentine e je une vore fuarte tes provincis di Corrientes e Misiones. A son diviersis versions, ma la plui popolâr e je chê dal setim fi mascli. Ancje se a Formosa, par esempli, si fevele de setime fie. La persone e mude i vinârs o i martars a miezegnot. Alore e mangje i purcits, lis gjalinis e i muarts dal cimitieri, e a voltis al mangje ancje un frutin no batiât. Te forme umane l’om lôf al pues jessi lunc, sclagn, di piel zale e cuntun odôr stomeôs.

Traduzion libare dal articul di Juan Batalla cjolte de riviste “Infobae” dal Otubar 2016. 
Autôr de traduzion: Marcelo Del Mestre

2 comments