CorseCurteSetembar#20 – Aiar

#20 – Aiar

“Alore vestu?”
Eros no lu molave e aromai al jere clâr che une rispuste al veve di dâle.
“Sì mo sì! O ven. O varai ben di dâ un sens a cheste robe…”
Di cuant che un an prin il so amì lu veve strissinât a fâ il cors di sub, no i veve dât recuie e, ogni mês, al tornave sot cun chê di fâ insiemit une imersion.
E alore daspò cualchi dì si cjatave sentât in gringule suntune barcjute cravuate, cun intor la tute di sub, pinis, bombulis e dut il rest.
Eros lu cjalave riduçant, plen di morbin. “Pront? Tu viodarâs ce figade! Dai: trê, doi, un… e jù!”
E cussi ancje lui si è butât.
Daspò di cualchi secont di sturniment al veve tacât a lâ jù, merit de saorne e ducj i siei sens si jerin come messedâts. I colôrs ducj filtrâts di blu, i sunôrs smavîts ma fuarts. Lis bufulis dal so flât a corevin sù viers la carene de barcje.
Cul lâ dal timp al tacave a gjoldi di cheste gnove condizion. I pareve di svualâ. Eros, simpri devant di lui, si voltave dispès a cjalâlu e siben che al veve mascare e bocâl, si capive benon che al jere contenton di sei li sot cun lui.
Al stave cjalant un pessat bocognon mai viodût prime, cuant che lis bufulis a vevin fermât di saltâ fûr.
L’erogadôr dal aiar par cualchi motîf nol funzionave plui. Berlâ sot aghe no si podeve, ma lui si vise di vêlu fat istès. Vêr o no, Eros si jere voltât juste in chel e vioidintlu movisi come un sfolmenât al jere rivât di buride.
A planc, intun timp che par lui nol finive mai, cuntune tirade di aiar par om a jerin tornâts sù, saltant fûr dongje de lor boe.
“Mai plui Eros, mai plui!” Distirât su la barcje nol jere bon di dî nuie altri.
E cumò, a mês di distance di chê esperience, nol podeve fâ di mancul di pensâ che chel imprest rot i veve gambiât la vite.
Al veve decidût di sbandonâ dut ce che ancje metaforichementri i gjavave il flât. Al veve molât il so vecjo il lavôr e lassât pierdi relazions cun chei amîs che lu scjafoiavin cui lôr discors banâi e vueits.
Cun Eros la amicizie no jere finide, dut câs cumò, cun lui, al leve dome in mont.

di Michêl Londar (Sporting Brugnul)
#1378

2 comments