CorseCurteOtubar#17 – Il fobic

#17 – Il fobic

Volevi scrivi une conte di pôre. Ma a mi lis contis di pôre e beh… mi fasin pôre. Però no volevi scrivi une di chês contis fantasy/horror buinis dome par halloween. E alore mi soi metût a pensâ aes robis che te vite plui mi spaurissin.
Il prin pinsîr mi è lât a lis malatîs. Mi soi viodût malât, in agonie tal ospedâl cun ator di me miedis cun la muse seriose e plen di fîi tacâts intor. Cuntun sgrisul jù pe schene o ai subit gambiât argoment. Ma il cjaf no si lu comande e di li no soio lât a filâ sul fat che al podarès sucedi alc ancje a la mê int, a chei che i ûl ben. Fîs, femine, parincj, amîs. E chest al è un vêr terôr. Un alc che ti gjave il flât parvie che non tu rivis adore a fâi cuintri.
Scjampânt vie di chestis robis masse brutis, mi soi concentrât su di une altre pôre che o ai: chê di sei coinvolt intun incident. Cun la machine o cul tren, o une coriere, parcè che che suntun avion jo no monti. Sino mats! Sù par aiar a milante metris di par cjere sierât dentri di un casselot di fier? No mo no. Ma ce conte sarès vignide fûr. No sarès rivât dapît. Masse impression!
Daspò, bombardâts come che o sin di notiziis su disarstris naturâi e gambiaments climatics che a sucedin ator pal mont, o ai pensât di scrivi alc su la pôre che al torni un taramot o alc su fûc e aghis pronts a sdrumâ la mê cjase. Mah. Miôr di no. A samêe masse la trame di “disaster movie” merecan.
Ao dite “bombardâts”? E alore ve che mi è rivât intor il teme de vuere. E intun marilamp mi soi viodût platât te cantine, bots di canonadis che a rivin dongje cjase, soldâts menaçôs che a cirin di puartâmi vie e di torturâmi e daspò butâmi intune buse cun altris cadavars. Propit come i rus in Ucraine. Che magari a an decidût di invadi dute la Europe e a son rivâts fintremai in Friûl. No no.
Ae fin, a colp, mi è vignude dongje la pôre plui grande di dutis.
Chê che se mi capitarà alc pardabon di ce che o varès scrit, cualchidun al varès podût dî: “Al è sucedût proprit come te sô conte!”
Alore o ai decidût di no scrivile.

di ***
#1***

1 coments On CorseCurteOtubar#17 – Il fobic

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît