Bask-in Rome!

Vinars dute la Osterie e jere a Muzane a meti adun il spetacul di Cryptofriûl (e e rive la croniche ancje di chê, cun calme) e sabide l’Ostir al jere a Codroip (cun coghe, sartore, dorondon e piçui aiutants) a presentâ il so libri… ma crodêso che i Piçui aiutants di Contecurte a stedin cu lis mans in man?

Lôr, lis mans, lis tegnin su la bale! La bale par zuiâ al bask-in! Insome… al covente che us contedin alc, stant che aromai i sucès de Zio Pino no si puedin plui platâ.  Tant al è vêr che setemane passade Jacum e Ricart a jerin nuiemancul che a Rome a zuiâ une partide dimostrative pe regjon Lazio, cuinti Pistoia, par mostrâ ce che al è il bask-in, dulà che a puedin zuiâ ducj e ognidun al pues dâ un contribût fondamentâl ae vitorie, se al è babio. E ancjemò plui babios lôr doi che a àn puartât la nestre bandiere fintremai denant dal Colosseu!

Tant par scomençâ, se o volês savê ce che al è il bask-in e cemût che si zuie cheste “bale tal zei inclusive” vait a dâ un cuc sul lôr sît, ma soredut, cuant che o savês che e je, vait a viodi une partide!

Ve chi, par dî, une biele foto di Ricart in azion, propite inte partide di Rome, vinçude dai nestris cuintri Pistoie, une des scaudris plui fuartis talianis. E chi sot us metìn ancje la foto di dute le scuadre, che nus pâr propit che – cundut de scarpinade a là jù a Rome a zuià e cori come mats – si sedi gjoldude la partide.

E insome… Chei di Contecurte a son simpri bulos!