CorseCurteSetembar#17 – Catans intal cûr

#17 – Catans intal cûr

L’auto si rimpine sacodant su lis cjaradoriis che a foropin ce che al reste de strade. Insom de cleve, il cjamin dirocât al cimie a malistent, glotût inte dismentie de boscaie che e à cjapât il puest dal zardin.
Il ciulâ dal puartonut scancarât al pant il bentornât a Catie, biel che si pronte a meti di gnûf pît ta chê che e jere stade cjase sô. Il barascjam al parone ogni cjanton, ma lis sôs vogladis maluseriosis a son dutis par ce che si plate daûr dal vert. Biroçs, seseladôrs, vuarzinis e altris imprescj cu la lôr ferace rusine, tant che soldâts colâts in bataie. Il cucâ di altris grabatui e strafaniçs a rindin la femine inmò plui insuride. Catans dapardut! Par agns e jere stade coionade dai amîs par chel vizi dal pari di tirâ dongje di dut, tant che le vevin batiade “Catie dai catans”.
Tal imprin, no i vevin displasût chei afârs plens di ruedis, vîts e mantiis di provâ, ma cuant che a jerin rivadis dongje ancje lis strafusariis de discjarie, i jere lât dut fûr dai voi.
E veve tignût bot fin ae malatie de mari, po dopo lui al veve folcjât di cragnis ancje il prât che al jere stât il templi de femine e Catie no jere plui rivade a tignî brene ae smare. Ae prime ocasion, e jere scjampade vie.
Cumò no tu podarâs plui protezi i tiei catans, e pense evocant la imagjin de bare di cualchi setemane prime. La tasse di scjatulons in biel ordin te jentrade le lasse cence peraulis. Purpûr, nissun al è mai vignût ca dentri. Al devi jessi stât lui, intai ultins moments di luciditât. Al à netât dut, sierât chel so mont confusionari dentri di cartons, ognidun cuntune scrite parsore.
Catie si ferme denant di une tor di scjatis a rosutis. “Lilia”. Il non de mari. “Soucs da la Nina”. I ven un rideç garp. E vierç il carton. I siei zûcs di un timp le cjalin, lustrâts e comedâts, come se a fossin pronts a vivi une altre vite. Une lagrime e lampe jù dai smursiei, ma forsit al è dome il polvar che si alce dai siei ricuart disvoluçâts.

di ***
#1***

1 coments On CorseCurteSetembar#17 – Catans intal cûr

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît