CorseCurteSetembar#16 – Erois

#16 – Erois

Come ogni citât, ancje Roncee e veve i siei erois, simpri pronts a difindile, cun lis lôr armis galatichis. Eco alore che a vot di matine di une cualsisei domenie e jere scomençade la esercitazion.
Un gran ton al veve dismot la citât. Dute la int si jere strucjade pe strade, par capî ce che al jere sucedût. Su la spice dal palaç comunâl, une sacume rosse si jere dreçade impins. Al jere Batifûc, il diaul des flamis, cul so sticeboris ipersonic (cussì lu clamave). Vuê i tocjave a lui la part dal trist.
In curt a jerin comparîts su la place chei altris doi erois, par contrastâ il demoni Batifûc: Britulex e CiduleMan!
Britulex nol saltave, nol svolave e al coreve a strachis. La sô uniche arme e jere une britule fotoniche (cussì le clamave) che no taiave parcè che no jere mai uçade. CiduleMan al jere çuet, al viodeve di un voli sôl e par chel al lançave a câs la sô cidule spaziâl (le clamave lui cussì).
Al scomençà Britulex, vongolant par aiar il so imprest.
— O soi Brit…
Nol veve rivât a finî, che une cidule di fier lu veve centrât in plen cerneli, sfrissant par pôc la svuarbarie.
— Aio cjapât il trist?
Al veve domandât CiduleMan al vigjil urban li dongje.
Britulex, sbrissant indaûr, al veve tirât la sô arme tal vueit. La britule e veve fat fionde suntun fîl de corint e partide di bot viers la muse di CiduleMan, cjapant in plen l’unic voli bon.
Batifûc, disperât, si jere metût lis mans tai cjavei, scotantsi la crodie.
Ma no jere finide. Recuperade la sô arme, Britulex si jere rimpinât su la gorne dal palaç comunâl, fasint une fature mostre. Cumò al jere denant di Batifûc. Une spudade su la côt par rinfrancjâ la lame de sô arme e al jere pront par frontâlu.
— O cumbini jo, Britulex!
CiduleMan, aromai vuarp di ducj doi i voi, al veve lançât il so imprest, smicjant (forsit) il demoni. Purtrop la cidule e jere rivade juste sul zenoli di Britulex e la cuarde si jere fate sù intune gjambe di Batifûc. Imberdeâts, ducj doi a jerin colâts abàs sul marcjepît, plombant parsore CiduleMan.
Eco finide la esercitazion. Ducj a jerin lâts a cjase plens di pachis.
Erois cussì no nassin!

di Massim Furlan (Sbreghebalon)
#1374

2 comments