CorseCurteSetembar#15 – No dome di siums

#15 – No dome di siums

Cuant che gno nono Zuanin al jere tal jet parcè che al veve une brute malatie, mi à clamât par dîmi che mi dave in regâl l’armâr te sô cjamare.
Un armâr dulà che cun i miei fradis o zuiavin da di piçui, malcuiets li dentri.
Ma jo no savevi la storie di chest mobil.
Al mi disè che lu veve fat cun lis sôs mans e diviers imprescj che lui al veve puartât te valîs. No dome di siums e vignive la valîs dal gno nono, cuant che al emigrà viers Argjentine te fin dal an vincjevot. Al puartave ancje un grum di imprescj: une manarie, une cjace, menevîts, un trapin, un par di tanaiis, un martiel, une see di marangon e diviersis planis e tantis robis che i permeterin di lavorâ sedi di muredôr tant che di marangon.
E mi contà che al veve fât l’armâr cul len de casse, de scjatule che so pari al veve fat parcè che mê none se puartàs in Argjentine, cun dutis lis robis, cuant che lui finalmentri le varès clamade par vignî a sta ca, cun lui. E il gno von al ricuardà ancje che al veve doprât une piçule plane che al veve fat so cusin, che al faseve il marangon tant che lui, e che ancje se al jere vuarp, al jere bon di fâ il so mistîr cun esatece.
Cun calme o tacai a piturâlu e netâlu un pôc, pe cjamare dal gno frutin, cuant che mi cjatai cuntune sorprese: sot dai doi scansei a jerin lis etichetis de spedizions. No ricuardi la date precise dal imbarc, ma al jere l’an 1930 cuant che gno pari al veve doi agns e a son partîts dal puart di Gjenue par chestis tieris. O ai un particolâr sintiment par chest armâr cun la storie de famee e che al jere passât pes mans dai miei e che vuê si cjate te cjamare di mê gnece.

di Cristina Degli Uomini (Lune Platade)
#1373

1 comment