CorseCurteSetembar#14 – Diviersitât di gjenar

#14 – Diversitât di gjenar

Mê none, nassude e muarte tal secul passât, si clamave Gjentile.
Nomen homen, a disevin i latins, e jê, in efiet, e veve propit il non cun sè: e jere di bon caratar, simpri di buine lune e dal dut impegnade in cjase pal ben stâ de numerose famee; in pocjis peraulis, e jere une di chês feminis de pazience antighe di une volte.
Il so om al jere un bon cristian, ma no farine di fâ ostiis (tal sens che nol jere cence imprescj e che, a la ocorence, al saveve doprâju), ma no i veve mai mancjât di rispiet e di sigûr i voleve ben, ancje se te maniere che si voleve ben inta chei timps, vâl a dî cence lassâsi lâ in mignagnulis sedie in public sedie in privât.
O ài vivût in famee cun lôr par plui di vincj agns, ma no ju ài mai sintûts cjapâsi pai dincj di brut, al massim cualchi cagnere ogni tant.
Plui dispès, sore dut di Istât, al sucedeve che lui al mugugnàs par vie che jê, cuant che sul misdì al lave a polsâ, i robave tal tacuin i centesims par comprâ il gjelât ai nevôts e po, come colant dai nûi, e faseve la gnogne.
Dome une volte, pene sposade, mi veve contât che lu veve fat inrabià pardabon.
Une matine, tant che lui al jere lât a fâ fen tal palût, al jere capitât tal curtîl un confinant che, dal moment che il paron nol jere tai dintors, i veve domandât a jê il prestit dal cjaruç de jerbe e jê, beadine, pensant che nol coventàs, jal veve concedût.
Maledet il moment; di li a pôc l’om al jere tornât a cjase par cjoli propit il cjaruç e, no viodintlu sot la arie dulà che lu veve lassât e vignint a savê ce fin che al veve fat, al jere deventât ruan come une sope di vin.
Gjentile si spietave une strapaçade che Diu nus vuardi e no sigûr, a segne dêt, chês cuatri peraulis  che i veve dit: – Tu, femine, tu âs di prestâ padielis, no imprescj.
Nuie altri, ma la lezion i jere servide di regule par dute la vite, tant di lassâle di test a lis fiis e a lis fiis dai siei fîs.
E jere cussì che une volte si coniugave la diversitât di gjenar.

di Maghe Olstrele (Rosute Pelote)
#1372

1 comment