CorseCurteSetembar#18 – Vibrazions

#18 – Vibrazions

Il miedi al fasè jentrâ la siore. E cjaminave planc, cu la lungje cotule nere che e tocjave par tiere. Il corset al faseve risaltâ une figure magre. E someave un pôc spauride, e veve di jessi la prime volte. Il cjapiel a alis largjis i faseve ombrene su la muse, che e jere blancje e patide. Lu cjalave cun voi discocolâts, freantsi lis mans masse dispès. Aes domandis, e rispuindeve barbotant. E lamentave aciditât di stomi, mal di cjâf e, cualchi volte, une impussibilitât a movi lis gjambis e i braçs. Cualchi volte, ancje, i capitave di berlâ fuart cuintri de mari e dal om (ma cence intenzion!).
Nol jere il prin câs di isterie che i capitave, e nol someave nancje il piês.
Il miedi si metè a puest i ocjâi, si alçà e al disè “Ca mi scusi, o torni subit. Ai di piâ la machine”. La siore e fasè mot di sì cul cjâf, il miedi al lassà la stanzie. L’ambulatori, dut somât, al jere un biel puest. Il paviment di len, il mur blanc, i atestâts dai soi studis insuazâts cun cure su la parêt. Odôr di alcul ma ancje di tabac di pipe.
Al è un espert, si disè jê gjavantsi i guants, no stâ vê pôre.
“Ca si prepari pe cure che o pronti il jetut”, al disè il miedi, tornât te stanzie. Al jere contenton di chê gnove machine. Si visave ancje masse ben cemût che a lavin lis robis, prime: inflamazions continuis ae conole e dolôrs a movi i dêts. La sferute pelviche e tacâ a vibrâ.

Lis gjambis a tremarin une utime volte. Sierant i voi, e suspirâ fuart. Dentri di jê, il moviment plui segrêt e plui biel. Une danze cjalde. Nissun in cjase. Nissun pudôr, nissun fastidi. E tornâ a vierzi i voi, cun calme. Fûr al veve pene finît di plovi e i rais dal soreli a fasevin slusî il lastri. A cjalâlu, cuasi al inceave. E respirâ a fonts. La man drete e lassà la prese sul imprest. Il miôr acuist di simpri su Amazon!

di Margarite Cogôi (Volketitrai-Liga)
#1376

1 comment