CorseCurteLui#20 – Balute blu

#20 – Balute blu

Son passâts aromai trê agns. 1095 dîs. O sin rivâts chi il prin dal an dal 2053. Nûf mês di viaç come che al veve dit il paron merecan. E cun chê prevision perfete, “anno nuovo vita nuova” a disevin ducj i telegjornâi, nus pareve che dut di li indevant al ves vût di lâ vie cence fastidis.
Pionîrs, nus clamavin. Sglonfant di retoriche il fat che aromai la uniche sperance di continuâ a vivi suntun planet e jere chê di lâ a stâ intun altri. Parcè che a jerin lâts a finîle dibant i discors, lis cunvignis, i libris di milante sienziâts. O il scjas di chê fantate bionde, no mi visi plui il non, che e veve inmaneât cetantis zornadis di proteste e che ae fin e veve cirût di copâsi stant che la plui part de int e dai politics le cojonave disint che e jere une ritardade che e pandeve dome malumôrs tal cjâf dai zovins.
Ben! A vevin reson lôr. Su dut. Sui cambiaments climatics, sul fat che tal 2028 si sarès rivâts al pont di no podê plui tornâ indaûr. E cussi o sin cressûts dilunc agns e agns di arsuris e aluvions, cun la int che si fermave a chel inutil ritornel stonât: “ah. le aghe: o ‘nd è masse o no ‘nd è avonde”.
E alore i sorestants dai grancj paîs industrializâts e àn tirât dongje un slavin di bêçs par prontâ lis missions de maraveôse concuiste de gnove frontiere. Un gnûf mont che al scugnarà jessi par fuarce miôr di chel vieli. Pecjât dut câs che si sin puartâts daûr il nestri cjâf çondar e la nestre nature umane falade. E a mi mi pâr che in fonts nol sedi cambiât ce tant. Juste un secul indaûr, tal 1956, il pari di gno nono al jere in Belgjo a sgjavâ tes minieris di cjarbon. E jo cumò o soi ca sù par fâ busis simpri plui fondis e sgarfâ sotvie cun chê di cirî altris faldis di aghe. Stes mistîr vie, dome une tecnologjie plui siore.
Chê stesse tecnologjie che achì, das stanzis asetichis di chescj bussulots che o clamin cjasis, nus fâs viodi cuant che o volin, cun estreme precison chê balute blu di dulà che o sin vignûts.
Blu. Come la aghe che o vevin e che no vin plui.

di Michêl Londar (Sporting Brugnul)
#1329

2 comments