CorseCurteLui#19 – La agane

#19 – La agane

Agnul al jere un grant espert di plantis oficinalis e al lave dispès a pierdisi par cualchi mont a cirî chei flôrs che nissun al cognòs ma che a rindin risots e fertaiis cussì particolârs di lassâ tal palât une sensazion di delicât stupôr par oris dopo vê mangjât.
“Sore Pontebe” i veve dit so missêr “al é un cjanton là che tu puedis gjoldi par vie ch’al é un grant barascjan e par sigûr, cu la tô esperience, tu cjatarâs cuissà cetantis plantutis… ehi, no smenteâti che ti lu ai conseât jo… mi spieti une cene.”
E cussì, Agnul nol à pierdût timp e doi dîs dopo al jere di chês bandis a gjoldi ancje dai bonodôrs dal bosc.
Dopo une mieze ore si cjate devant di un riul e a balâ, dongje di chel riul, une fantate, biele come nissune ma che te sô bielece e contignive lis bielecis di dutis lis feminis dal mont, vistude di blanc, un pôc trasparent di viodi e no viodi formis, ombris, forsit un tetul, par sigûr la sô perfezion. E e balave! E veve i pîts tacâts par tiere, ma al jere come se e svolàs. Un bal mai viodût, une sensualitât impussibile par une umane.
Agnul al veve vût murosis bielis e la sô femine e jere une maravee. Ma chê li. Nol jere pussibil no inamorâsi di jê. E cussì al é stât. Agnul i é lât dongje e si é lassât puartâ in aghe.
– Jo mi soi simpri domandât ce ch’al sucêt cuant che une agane ti puarte in aghe. Inneistu? O jentristu tal mont de magjie?
Chel riul al jere font va e no va trente centimetris, ma Agnul e la agane a sprofondavin. Lui nol capive plui nuie ma la pôre di finî sot e jere tante. Di bot a sclop si é cjatât dal dut sot aghe, al tignive il flât, ma nol podeve no respirâ a lunc, cussì al à spalancât i polmons e, no si capìs, al jere intune condizion di respîr sospindût, impussibil di spiegâ, ma tant al jere.
Cumò Agnul al é tornât a cjase, nol conte a nissun ce che al à vivût in chei cuindis agns tal flum. Al vîf sierât intune stanze di cjase sô, dome la femine lu pos viodi ancje se lui no le à mai plui cjalade cun i voi di prin.

di Alessandro Valoppi (Reâl Cocâl)
#1328

2 comments