CorseCurteAvost#14 – Une punto blancje

#14 – Une Punto blancje

La machine e someave lâ di bessole, cuasi sbrissant sul asfalt in chê sere di Lui. Il cjalt morestât di une brise frescje al faseve inamorâ i crots e sgrasaiâ lis cialis intune cjante infinide.
L’Istât al voleve za tacâ a finî. Ce pinsîrs di fâ e ce stupide jê a pierdi timp a cuistionâ su la fin che e tache! Lis mans sul volant, Angela e distudà la radio par gjoldisi chel moment magjic. Un cjavrûl, doi cjavrûi te boschete a drete! Ce biei! A vegnin fûr dispès ae ore dal tramont. Il passaç tra dî e gnot al strie i oms e i nemâi, al stice l’istint. E al sbreghe il confin jenfri ce che al è vêr e ce che no si sa. 20:08, ore di cene. I vevial lassât alc di mangjâ o varessie vût di fâsi di cene jê? Cu la code dal voli e viodê lampâ il telefonut, sigûr un whatsapp di Fabio che le visave.

La machine e someave propite lâ di bessole intant che Angela e pierdeve masse timp a cjalâ chel messaç. La Punto blancje e cambià corsie e e saltà il fossâl alt de Pontebane planant cun gracie su lis agacis sot. Po, come intun libri fantastic, la machine e cambià direzion, alçant il mustic viers il cîl, cence nancje vê mai tocjât tiere. Angela e alçâ lis mans dal volant, lizere. Fabio al varès fat cence di jê. I jere ancje passade la fam!
La Punto blancje e jentrâ cence rumôr ta chel grant nûl blu striât di zâl che al coronave il cîl. Sparniçadis dulintor a berlavin lis grandis maglis colôr di rose, viole e blanc. Lis lûs dai paîs, sot, a deventavin dome un tapêt di piçulis storiis simpri plui lontanis che a slusivin tal lôr adiu cidin. L’aiar al pulsave. Angela e viodè lis primis stelis, e sierà i voi. Adiu.

di Margarite Cogôi (Volketitrai-Liga
#1346

2 comments