CorseCurteAvost#07 – Auroris e Amonts

#07 – Auroris e Amonts

Chê buinore Dele si sveà cun vigôr. Al jere tant timp che nol sucedeve, e sintive che il materàs i macolave i vues. E vignive di un amont neri come il cjalin, dulà che mai nuie al cambiave di colôr, e veve pierdût la emozion di vivi.
Si metè in senton. Une brise di aiar e movè lis tendutis lassant jentrâ te cjamare un rai di soreli che si poià sore une scjatule cuasi platade parsore dal armaron,  l’involontari moviment des tendutis cubiât cul lusôr al rimovè il strât di polvar che le cuvierzeve, faliscjis di colôrs si alçarin jemplant di moviments la stanzie.
Recuperade la scjatule le poià sul scagnut, si indalegrà sintint un benstâ fisic, e cjalà lis bucolichis senis pituradis che le ornavin. Purpûr un sens di pudôr le blocave tal vierzile, e veve pôre dal contignût, di cjatàsi cun chês fotografiis che le ritraevin dilunc de sô vite. Di tant zirâle e voltâle, il mecanisim de scjatule si azionà di bessôl vierzintsi, forsit plui cul desideri che cun la volontât di fâlu.
Cualchidune des fotografiis le ripuartavin a lontans ricuarts plens di auroris prometentis e altris, plui resintis, le mostravin  vistude di neri pal corot.  In chel moment si de cont che e jere rivade li che la crosere e divît lis stradis. Un lamp di savietât le conseave di cjapâ in man di gnûf lis redinis de sô vite, sigure che il piês al jere passât.  E rivave a capî che chei ricuarts sveâts a traviers des imagjinis a vevin il podê di riparâ lis auroris e i amonts vivûts.
Dele e jere stufe, strache di stâ sot il comat di chês crôs che no le lassavin plui respirâ. E voleve colorâ  ce che i restave dal vivi. Si svicinà al barcon vierzintlu, un rai di soreli aviertan al cjareçà chel vîs ingjavât e grispôs.
La vite i slungjave di gnûf la man.

di Galliano di Buenos Aires (Sicheduncje)
#1340

1 comment