CorseCurteLui#12 – Limpidece

#12 – Limpidece

Un tramont seren al insuazave une sere d’Istât propite perfete, il vint al soflave frescut, just a pont par rivâ in maniere degne al apontament.
Tant che al capità dongje un pôc prime al prossumà di fermâsi par un ghiringhel. Salacor un tai di alcul lu rindarà un pôc plui rilassât. Subit daspò al refudà vie chel stimul, al saveve benon che l´alcul nol jere une pussibilitât.
Trê dîs in daûr Marie i veve dit di sì al so invît. Lui i jere stât daûr sin che a jerin canais. Par agns a ogni domande di svicinament al so cûr al cjatave pardabon un mûr. Chel di Berlin, par lui no si jere mai sdrumât. Cualchi timp daspò di vê fat i disevot al partì vie pal forest e al al jere tornât indaûr di pôcs mês.
Cumò lis robis a jerin cambiadis, ducj i doi si svicinavin ai cuarante e lis pussibilitâts di restâ di bessôi a tacavin a fâ crevadure te corace. Al jere sigûr di vê dome une ocasion e si domandave cuâl troi cjapâ par rivâ insom: chel dal cidinôr, chel de mascare o chel de trasparence. Salacor un mismàs di lôr e podeve jessi la miôr ricete.
Al rivà par prin cul cûr in bocje, al jere convint che i prins cinc minûts a saressin stâts la clâf de vicende. Timp o tart la domande e sarès rivade e al veve di dâ la rispueste juste, juste par lui, juste par jê e ae fin dai conts juste par che al sedi un “lôr”.
Par fortune jê e cjapà la iniziative, intant lui si ingrampà al cidinôr.
Subit daspò al rivà il timp de mascare e tal fevelâ de sô assence dal paîs al de dome cualchi indizi. Cuant che il camarîr si parà dongje a domandâ la robe che a vevin voie di bevi al crodè di jessi pront par dîle dute.  Intant che jê e ordenà un tocai lui si blocà. Al veve dome di tirà fûr cuatri letaris e nol rivave a bon. Dibot, di sot vôs al batè fûr: “Aghe, un tai di aghe”.
Il camarîr si ritirà cence fâ nancje un mot e jê e continuà tant che nuie.
Daspò chel turbin di acjadiments al tornâ te fevelade, solevât, di no vê dovût spiegâ che al steve jessint di un recupar par un brut câs di alcolisim.

di Lenart Gjavedon (Scalembrut)
#1321

2 comments