CorseCurteLui#09 – Leturis Biblichis

#09 – Leturis biblichis

E conte la liende che in chel piçul paîs di mont circondât di boscs, cuasi ducj i oms a jerin boscadôrs, si ju viodeve partî a buinore cul necessari par podê butâ ju il morâl just, une volte rivâts tal puest, a parecjavin dut par fâlu, dovint valutâ tancj aspiets. Ognidun dai boscadôrs, une volte fat colâ il morâl, lu marcave cuntun numar che lu faseve proprietari dal stes, podopo lu butave tal flum che lu menave ju a val.

Jo, che o  fasevi chest mistîr cuntune finalitât personâl, impen ju intassavi. O jeri un apassionât letôr di storiis biblichis e o vevi une idee che mi remenave tal cjâf bielzà da agns, o varès costruît une grande barcje come chê dal diluvi universâl.

Di píçul in sù e daspò di zovin, no pierdevi la ocasion di lâ a scoltâ chei predicjadôrs  che simpri dal alt di un pulpit e cun la autoritât che ur dave il lôr ministeri a creavin une velade atmosfere di sintiments misteriôs, esemplificant lis lôr filipichis cun grandiôs acjadiments

O vevi la cjase tal bosc, femine e trê fruts. Cuant che o scomençai a lavorâ te grande barcje, ducj chei altris boscadôrs mi coionavin cjolintmi vie: – Orpo, stâstu deventant mat? Âstu di puartâ a spas la tô biele?
Jo no ur fasevi câs, o levi indevant splanant breis a rote di cuel, intant che o disevi: – Il fat al è sucedût, nomo? E dut chel che al è sucedût al tornarà a sucedi.

Jo o passai la mê vite lavorant dì e gnot tal progjet, a man a man che chest al cresseve, mi cresseve ancje la barbe, tant, che o rivai a someâ a chei patriarcjis des mês leturis.

Di spes o alçavi i voi al cîl, al jere un grumon di timp che no si nulave, fintremai che une zornade di biel soreli, di bot si fasè gnot fonde, lis saetis a scomençarin a zigzetâ come matis lassant daûr di lôr il ronronâ dai tons.

Jo o vevi a penis finît di meti l’ultin claut, che o sintei il zigâ disperât de mê femine: – Noè, Noè, ven di corse a scoltâ, il boletin meteorologjic al fevele di grandis ploiis.

di Galliano di Buenos Aires (Sicheduncje)
#1318

2 comments