#08 – Catine e Aghe
Catine e veve dîs agns e in dut il so paisut e jere considerade come une frute d’aur: jê e judave sô mari tal ort e cu lis bestiis de stale e dal pulinâr, a netâ in cjase e a fâ di mangjâ. Però e jere ancje masse credençone a dut ce che i contavin, soredut a scuele, dulà che i siei amiis si profitavin de sô ingjenuitât e cussì i contavin ancje monadis, par dopo ridii daûr. Come in chê volte che Meni, il plui mataran dai siei compagns di scuele, si veve inventât la storiute juste di contâ a Catine.
E biel che, finidis lis oris di scuele e tornant a cjase, al veve tacât a dîi: – Catine, mi àn contât chê altre dì che tal mieç dal vuestri cjamp vicin de tô cjase al è un puestut dulà che une gnot i agnui a àn semenât une plante, che cuant che e deventarà grande us fasarà siôrs plui dal sindic, parcè che invecit dai pomis e butarà fûr carantans d’aur! Intant però tocje simpri dâi tante tante aghe!
Alore Catine si fâs mostrâ il lûc e e decît di bagnâ la tiere ator ator ogni matine prime di lâ a scuele e ogni sere prime di lâ a durmî. Jê e continue cussì par cualchi mês, ma de tiere nol ven fûr nuie. E Meni che le tontonave di insisti e intant si le rideve par sot.
Ma une matine, ta chel puestut Catine si cjate sdravacade une biele gjatute rosse, che subit i smiaule fuart e si sfreole ator lis sôs gjambutis. La aghe dal sborfedôr i cole par tiere e Catine e cjape di bot in braç chê maravee pelose e e tache a bussâle fuart cun tant amôr.
– Alore ti clamarai Aghe!
E cussì e je cambiade ancje la vite di Catine. Di fat Aghe za a buinore e compagne a scuele la sô paroncine e dopo si met a zirâ pal paîs, e a ognidun che le incuintre jê si ferme e lu salude cuntun grant miaooo. Alore ducj le saludin, le cjarecin e i ven une strente al cûr, un sens di afiet, di trancuilitât e di bon stâ. Aghe cussì e à concuistât dute la int dal paisut e e je deventade preseose, necessarie e impuartante par ducj, propit come che al è chel liquit cussì indispensabil clamât aghe.
di Renzo Turùs (Il Fi di Marie dal Cafè)
#1317
2 comments On CorseCurteLui#08 – Catine e Aghe
E je vere che detule, che se lis robis no van ben di une bande e van di che altre, e che cui samene costance al racuei realtât, e cussi Catine no varà racuelt palanchis, ma un gjiatut a meti ligrie in dut il paîs . Lussian
Pingback: FANTACORSECURTE – ZURIE DAI LETÔRS – LUI 2022 | Contecurte ()