CorseCurte#02 – Mari Mâr

#02 – Mari Mâr

Un cjalon al orloi par controlâ i timps di autonomie e po il cjâf sot aghe. Cumò al scomence il biel, li che la aghe e je vonde fonde. Aghe sot e cîl parsore. E lui intal mieç. Salacor al vignarà a plovi, al è un burlaç che al è daûr a prontâsi bande amont, e alore al sarà ancjemò plui biel: aghe sot e aghe parsore. Ma par cuant che chei nûi neris a rivaran chenti lui al sarà za tornât a rive. Al à chei tancj minûts calcolâts par lâ e chei tancj par tornâ.
La int su la splaze e je za deventade puntins. Benon. Ancjemò sîs minûts e po al fasarà denant-daûr. E sarà stade une bielissime nadade, chel che i coventave par sbrocâ fûr ducj i bruts pinsîrs.
Il burlaç al sclope dut un bot, a bruse cjamese. Un aiaraon di no crodi. Al tache a plovi e a tampiestâ. Aghe sot, aghe parsore. Ma aiar, aiar.
Lassin pierdi chei sîs minûts, al sarà mior tornâ indaûr.
Eh! Une peraule!
Al si vise subit che no je facile. Al à dut il vint cuintri. Ma lui al è fuart, al nade un tic in sbighet, cussì di tajâ il vint cence cjapâlu di pet. Pont di riferiment, la spice di tiere a man çampe e chel trampulin là, il so angul di vision al à di puartâ il trampulin a la altece de spice e po simpri plui in dentri.
Ma i covente pôc par capî che il trampulin, invezite di svicinâsi al si slontane. Nol rive a fâi cuintri al vint. Une onde grande i mole un sberlot che lu bute jù sot aghe. Scatûr, terôr. A fuarce di vitis al rive adore a tornâ paron dai siei muviments. Ma, propi cuant che al è li li par meti fûr il cjâf, i pâr di sintî une vôs che lu bloche:

…e la aghe simpri
i fevelarà al cuarp
la sô dolce lenghe di mari.

Altre onde, ancjemò plui grande. Ma nol à plui pôre. Al si sint dentri une grande pâs. Par ce fâ barufâ cu la aghe? La aghe e je mari, no isal miôr bandonâsi intai siei braçs?
Nol nade plui. Al si lasse puartâ. L’orloi no i covente plui, lu gjave vie. Po, cuntune ultime acrobazie, al si gjave vie ancje i barghessins. Ve ca che o soi, mari! O torni, cjapimi in braç, fevelimi la tô dolce lenghe.

di ***
1***