CorseCurteMai#20 – Cuviert di nûi e stelis

#20 – Cuviert di nûi e stelis 

Mi veis ingomeât. Us al vevi dit za timp fa. E cumò lu ai fat!
Voaltris cun la vuestre maniere di vivi.
Oms e feminis plens di tristerie.
Bogns dome di viodi il mâl in chei altris. E pronts a fâlu ae prime ocasion.
Sotans devant di ducj i potents e incarognîts cuitri ducj i biâts.
Simpri di presse par cori cuissà dulà e par fâ cuissà ce, baste no fermâsi mai a pensâ a cui che si è e ce sens che e à la vite che o menais.
Vuarps che no viodin chei altris.
Sorts a ce che a disin.
Muts par jessi sigûrs di non esponisi e restâ ben platâts in vuaite pronts a movisi par daûr.
O ai dite vonde a dut chest. Jo no soi come vualtris.
Mi fâs stomi il casin. No sopuarti la malegracie e lis tristeris dibant.
La mê cjase cumò e je il bosc.
La mê muse e gjolt a jessi patafade dal soreli, da ploie e dal aiar.
O tabai cun lis paveis, i mierlis e lis cisilis.
Lis mes barufis a son cui corvats, lis chechis e i farcs.
O nasi l’odôr dai flôrs, dal muscli e dai foncs.
O scolti il sunsûr dai gnotui, dai çus e dai cais.
O puarti rispiet pai lôfs, pas bolps e pai grifons.
Sì, lu ai fat! Us ai molât al vuestri destin digraciât e irecuperabil.
Cheste cumò e je la mê cjase.
Mûrs di arbui, paviment di jerbe e cuviert di nûi e di stelis.

di ***
#***

1 coments On CorseCurteMai#20 – Cuviert di nûi e stelis

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît