CorseCurteMai#10 – La Cjase dal Boboròs

#10 – La cjase dal Bonoròs

Cemût?… Dut in sest?… Vuê, a sun di conseis dal gno agjent stampe o ai di lâ in face dai miei fans te Tiere , par vie di resints scandui di marcjât: a son un grum.
Jelena mi a conseât di fâmi viodi tant che une figure dongje di lôr, comude, vicin, di cjase, impen di un tâl temibil e lontan di ducj e di dut.
Cussì o ai decidût di descrivi la mê cjase dal didentri, contâ cemût che e je une zornade tal Infier, che nol è chel Infier secont lis lezions di storie: chês a son dome rapresentazions de invidie dal om, no, la mê cjase al è un sît ninin, che al plâs a ducj chei che lu visitin.
Impen di chel cjalt scjafoiaç che al fruie il cuarp secont lis storiis, lis mês cjamaris a son dutis refrigjeradis, mantignudis dilunc vie Unvier e Istât intune temperadure di confuart di 23° C, sì che duncje i miei ospits a puedin polsâ sparniçâts ben planchin tes poltronis intant che a son classificâts.
Daspò de classifiche, lôr a passin inte Cjamaris des Deliziis, dulà che a restin fin che o ai il timp di cognossiu di persone: cheste cognossince e je fondamentâl parcè che si jo ju cjati interessants, in maniere inteletuâl, lôr a puedin restâ là sine die… o sin che jo o mi stufi di veiu.
Ancjemò vuê a son là: il Alighieri (il gno prin consulent de Aministrazion), un o doi Borgias, un tal Machiavelli e int dal gjenar. Un grum di altris nus àn lassât cence lis gaudiis e i dolôrs de vite tant che Mugabe, Castro, Chavez e Hitler.
Chescj a son stâts butâts fûr, cence pinsîrâ, intes Cjamaris des Pinitincis, dulà che a vegnin cjastiâts cun films cence polse, di oms in brasilianis cu lis cjalcis, e mafiôs vistûts cun gjachetis di corean blanc. Par inzornament dai timps, e ancje par imponiu une punizion in grant, pôc timp indaûr o vin metût peliculis di oms piçuluts e gras vistûts cun braghessis similis alSignôr Gru (chupines) e une schirie di films di cûi di Kardashians vistudis cun animâi – print… lu clamìn: cjastì par riviel.
Par motîfs cognossûts di ducj o ai di puartâ chest opuscul sul finâl: si sintìn in curt!

Il Boboròs.

di Marcelo Del Mestre (Argo Patùs)
#1268