CorseCurteMai#09 – Chei cuatri mûrs

#09 – Chei cuatri mûrs

No mi à mai plasût trop il lâ pes cjasis dai altris: mi somee simpri di disturbâ, di lâ masse dentri te intimitât dai parons. Ma cuant che un al jentre tal cûr di chei cuatri mûrs dal Friûl e al è ben acet, alore si sint a colp une atmosfere di bonstâ e di armonie.
Il popul furlan le à però tal sanc di rivâ a tirâ sù chei cuatri mûrs, di sintîsi braurôs su la sô proprietât, che i pâr di vivi come intune isule tal mieç dal mâr. Il vê la tavernute cu la taule grande e lungje, une cantinute dulà che si ten il nestri vin furlan e i salams e persuts, di disniçâ a ogni buine ocasion; il tignî e lavorâ chei cuatri strops di ort par vê la salate, lidric, coçutis, pomodoros, cudumars, vuainis: chest al è par un furlan un codiç di compuartament sacri che o vìn ereditât dai nestris vons, cuasi un oblic morâl che nus aparten di simpri.
Ultimamentri lis cjasis di cumò a àn sul devant un zardinut cun arbui di ulîf, la magnolie, il bedoi e il vencjâr.
Ma a mi mi ven di pensâ a chês cjasis di contadins di une volte, dulà che tu jentravis di un grant porton di fier o di len, e in bande arbui di cacâr, di cocolâr, di gnespul, di figâr e di cjespâr. Parsore la puarte di jentrade e faseve di tetoie la plante di vît merecane, cun chê ue cussì dolce che nus plaseve tant a noaltris fruts. La cjase contadine e jere alte trê, cuatri plans e e veve la stale, i cjôts e in bande il pulinâr, e plui di cualchidun al tegneve ancje la voliere.
Tal mieç dal curtîl e jere la pompe de aghe cu la vasche di piere e tal so gabiot no mancjave mai un cjan, che di solit al jere leât cu la cjadene. Tal plan parsore al jere il cjast, dulà che si tegnevin il fen, sacs di forment e di mangjâ pes bestiis e altre rabaldarie, e dulà che di scuindon si lave a morosâ.
Dentri la cjase di contadins al jere dut sempliç ma pratic e funzionâl come che e je la nestre int. Il centri al jere il fogolâr par fâ di mangjâ e par scjaldâsi e cualchidun al veve il fuc e la nape propi tal mieç de sale e ator ator lis bancjis di len par riunîsi di sere, par contâsile e par scjaldâsi, par scussâ panolis, vuainis, fasui e vie indenant.

La cusine no jere tant grande e veve la vasche di piere e un grum di fersoriis e cops picjâts sui mûrs e no podeve mancjâ il for di modons cun parsore i anei di fier e di solit si meteve il pignat dal mignestron, la fersorie de polente, chê par fâ la fertaie e chê de aghe par lavâsi e la cogume dal cafè.
Dutis lis cjasis a vevin i sufits alts e di sigûr intes stanziis e tant mancul tes cjamaris no esistevin i caloriferos. Par vê un ninin di cjalt e di clip intal jet si puartave un modon scjaldât o la borse rosse di gomme cu la aghe, e plui indenant cui agns si usave il scjaldin di aluminio, plui grant e taront.
Sot dal jet nissun si dismentee il famôs “bocâl” smaltât blanc cul mani grant, che cuant che si tirave fûr tocjave fâ a plancut e stâ atents di no spandi… E a proposit di jets, i prins a vevin i materas di scussis di panole, che cuant che tu ti ziravis si faseve la buse tal mieç e tant rumôr che al dave fastidi… E dopo par cuvierte tu vevis la trapunte di lane gruesse cuside a cuadrei di colôr modon e pesantonone, ma sot di jê tu si sintivis un grum protet e a vonde tal clip.
Mi visi ancje che gno pari al usave meti parsore dal armâr, ogni an dopo lis vendemis, tancj raps di ue blancje a madurîsi e che si conservave biele sane fin pes fiestis di Nadâl… A la fin par cjacarâ no dal bagn ma dal “cagadôr”, al jere sistemât di fûr e in bande intune baracute di len o di bandon, e e veve la bree di len cu la buse tal mieç, e vuai a falâ mire! Ma soredut par netâsi, cui vevie la cjarte igjeniche in chê volte ? Cuadrei di gjornâl picjâts cul fîl di fier e cuant che a jerin finîts si scugnive lâ di corse tal bosc a crevâ fueis grandis e resistentis…
A viodi la cjarte igjeniche di cumò, ingrispade, colorade, cu lis rosutis, “a tre veli”, mi ven dome di ridi…

di ***
#12..

3 coments On CorseCurteMai#09 – Chei cuatri mûrs

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît