CorseCurteAvrîl#25 – Creance

colombe dolce

#25 – Creance

Dal so voli di mandule glassade, la colombe e pâr cjalâ Manuela di stos, biel che lis alis si sfantin par simpri dentri de fumate des scovacis.

I à pensât parsore une setemane dilunc, intant che il dolç i cimiave cu la muse mieze spilucade. Le veve tacade tun moment di gnervôs, gjavant vie la scusse di zucar e robant cualchi candît. Ma no le varès mai mangjade dute: a jê no i plasevin nancje, i dolçs di chê fate.

E varès vût di sgnacâle ae vicine, chê restade vedue, magari cu la scuse di lâ a cjatâle, che no jere nancje stade al funerâl. Cumò però no podeve mighe regalâle, dute becolade e cu la scjate ruvinade.
E varès podût puartâle a chel dal plan sot, che sô mari e tignive ancjemò lis gjalinis. Ma trai une colombe cuasi interie intun pulinâr i pareve un pecjât mortâl.

Miôr sfruçonâle inte terace. E se a fossin rivadis lis furmiis? Alore si podeve lassâle tal parcut dal condomini. Dopo però a saressin vignudis dongje cuissà cualis besteatis.

La miôr soluzion e jere chê di butâle vie. No tal umit, tra i scus di ûfs e i fondacjs di cafè, si sarès sintude in colpe, ma, sierade inte sô confezion, dentri dal sac de indiferenziade, forsit e sarès stade recuperade di cualchi bastardin… te discjarie.

Il viaç fin al plan tiere al fo un torment, al pareve che dut il palaç si fos metût dacuardi par balinâ ator. Rivade difûr, si premurà di platâ il sac daûr di chei altris.

La buinore, sacraboltant pe svearine che no veve sintût, si invià jù pes scjalis, juste in timp par viodi il camion des scovacis puartâsi vie i siei refudums. Manuela si lassà scjampâ un rideç, prime di cjapâ la machine e inviâsi cjantuçant tal trafic de citât.

Inte polse cu lis coleghis, tra un jesolament pai dispatriâts di vuere e une voglade ae gnove buteghe di vistîts, si sarès concedude un capucin cuntune brioche e magari, tal dopomisdì, i varès ancje lassât l’euro dal carel al neri fûr dal supermarcjât. Dal rest, al bastave pardabon un piçul gjest par sintîsi miôr e judâ chei altris.

di Cjicechepicjedispicjelacite
#1256

1 coments On CorseCurteAvrîl#25 – Creance

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît