CorseCurteAvrîl#23 – Bestiis virtuosis

#23 – Bestiis virtuosis

Padue, 1395

Sentât tal so cjadreon, cu la spade poiade su lis gjambis, Flôr dai Libars al cjalave fis chel sandron di un zovin che al veve devant.
Al jere alt, cun dôs spalis cussì, e cuntune muse cul cei braurôs. I ricuardave lui istès, cuant che al jere plui zovin e al torzeonave di ca e di là des Alps par imparâ la scherme dai miôr mestris di armis talians e todescs. A diference di lui cuant che al jere zovin, però, chest sanson ca al jere dal sigûr di une sclibe plui nobile e asiade de sô, a judicâ de fate ecelente dai siei vistîts e soredut di chê bielone spade lungje che i picjave dal ombul.

«Si che tu âs dit che tu ti clamis Galàs…»
«Galàs di Mantue, sì, mestri, Par servîLu»
Flôr al riduçà. Al poià la spade cu la ponte dal fodri par tiere e si fasè infûr su la cjadree par olmâ miôr chel zovin.
«Po si po, però tu sês tu a vê dibisugne dai miei servizis» al disè, biel che il so riduç al mudave intune ghigne salvadie.
«Sì, mestri. O ai une disfide vierte cun sâr Bucicart, maressial di France…»
Flôr al fasè une sivilade di maravee.
«…e o vuei vê il miôr jenfri dai mestris di armis par prontâmi par chest duel»

Par un moment la espression di Flôr e mudà e si fasè dute serie. No i freave piç, a lui, des adulazions di un zovin nobil. Però l’aversari di chest zovin, il Bucicart di France… joi! Chel cavalîr al veve la reputazion di jessi imbatibil. Se Galàs al fos rivât a batilu in duel, al sarès deventât lui il cavalîr plui innomenât di Italie… e part de glorie e sarès stade ancje dal mestri dal vincidôr, naturalmentri.

Di bot, Flôr al jevà impins. La sô muse e jere tornade a mostrâ chê ghigne salvadie di prime.
«Po ben alore» al disè dut animôs. «La tô preparazion e tache di cumò. Sot de mê direzion tu impararâs a batiti tant che une bestie. Anzit: tant che cuatri bestiis: tu impararâs a vê l’ardiment di un leon e la cautele di un linç; la sveltece di un tigri e la fuarce di un elefant.
Niciti! Va jù in curtîl e tire fûr la spade, nol è un moment di pierdi.»

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît