Visions in Ostarie: Piccolo Corpo

Visions in ostarie
Piccolo corpo
Regjie di Laura Samani
Produzion: Nefertiti Film, Rai Cinema, Tomsa Films, Vertigo
Jessude: 2022

CE FILM ISAL?
Un film che al dure une ore e mieze ambientât intun Friûl arcaic e cence timp, cun paisaçs salvadis e spetacolârs che a van da la marine fin ai monts. I lengaçs fevelâts tal film a son il maranot, il furlan e il sloven. Lis atoris protagonistis a son Celeste Cescutti (al so prin film) e Ondina Quadri (uniche atore professioniste dal film).

MA CE ISAL DENTRI, DI PRECÎS?
(Atents che achì si conte un pocje di trame, se no tu vûs savê, no stâ a lei)
La storie di Agata, zovine maridade di pôc che al inizi dal film e parturìs une frutine nassude muarte. Il plevan i dinee il batisim, ma Agata no acete che la sô anime e sedi confinade tal limbo, dulà che je no podarà incuintrâle nancje dopo muarte. E ven a savê che “al nord” te Val Dolais al è un santuari dulà che i frutins nassûts muarts a vegnin “sveâts” par un moment, juste il timp di batiâju, e e decît di partî. Par strade e cjate Lince, personaç misteriôs che prin al cîr di imbroiâle e dopo invezit la compagne tal so viaç, e anzit al darà un jutori fondamentâl par puartâ a bon fin la sô mission.

MA CUI ISE LA REGJISTE?
Laura Samani e je une regjiste e senegjatore nassude a Triest tal 1989. E à fat il cors di regje tal Centri Sperimentâl di Cinematografie di Rome. Tal 2016 e à diret e scrit la senegjature di “La santa che dorme” un curtmetraç ispirât ae religjositât popolâr che al fevele dal passaç de infanzie ae etât madure, zirât tes valadis dal Nadison. “Piccolo corpo” al è il so prin luncmetraç, e al è stât presentât a la “Semaine de la Critique” di Cannes dal 2021.

A CUI I PUEDIAL PLASÊ?
A chei che ur plasin lis storiis che a contin de pierdite e di cemût frontâle. A chei che ur plasin lis storiis peadis ai un viaç e cemût che i personaçs a cambiin par chel. A chei che ur plâs il stîl dal realisim magjic, un lengaç fat di simbui e un sens religjôs che nol è catolic in mût stret ma plui leât ae sacralitât e unicitât de vite e de persone.

E SE O AI VOIE DI VIODILU?
Piccolo corpo al è stât in programazion al cine Visionari a Udin, ma tu podarâs cjatâlu di sigure ancje in altris ocasions. Chi sot il trailer.

1 comment