CorseCurteAvrîl#6 – La Bestia

#06 – La Bestia

Mi àn invocât.
Al è stât un tâl siôr Serafin (ironic, no mo?) che al à convocât a scrivi contis sul teme Bestiis e jo che o soi, tant che “chel altri”, onissient e onipresint o ai scoltât e cjapât il testemoni: o soi il epitome de peraule: o soi “La Bestia”, sì: Belzebù, Satane, Lucifer, Abbaddhom, Jaldabaoth,  Mammon…uf!, in curt: il diaul.
Parcè fasêso chês musis di pôre? Stait cuiets, nol è ce pinsirâ, o ven cuntune buine gnove: O soi lât in pension. Sì, il gno lavôr te tiere al è finît. O soi sodisfat: i arlêfs a àn sorpassât il mestri.
Cetancj agns a insegnâ tristeriis al om e lui al à rispuindût cun grant profit. O soi vignût fûr cun lis plaiis di Egjit e lôr mi an rispuindût cu lis pandemiis. Ju ai menaçâts cu lis flamis dal Infier e mi àn rispuindût cu lis vueris dal petroli e la ricercje des armis di sdrumament massîf. O ai butât jù civilizazions interiis cu la scuse religjiose e lôr mi an ripaiât cu lis puliziis etnichis. O ai cjatât fûr chel imbroi dai nûf cerclis dal Infier e lôr à an cuintriatacât cun i vêrs rufians, prossenets, adulatôrs, simoniacs, strions, laris, conseîrs fraudolents, falsificadôrs, e psicopatics cun deliriis di Zar che par sorpassâ il complès de bighe piçule a son bogns di distruzi la vite di milions cence un fregul di colpe.

Èhila!: gnove di agjenzie: il auto elet Zar cul complès di inferioritât al è deventât par so cont la gnove “Bestia”, di mût che lu ai nomenât il gno rapresentant in Tiere.

O speri che no us defraudi e al tiri dilunc, in dì di vuê dut al somee che al sarà cussì, ma si par câs lui nol rive a stâ a la mê altece us lassi chi la direzion di pueste dal gno agjent stampe: jelenaolaffdottir@montvelenosis.com, e tant che al e stât fin chi, o podarês lassâ i vuestris reclams tal sît web www.hell.org dulà che intune o chê altre polse di feriis us leiarai cun atenzion: in pension ma no muart, eh!

(firmât) Lucifer (il gno non favorît, bulo, no mo?)

Poscrit: Whatspp: (dome urgjences vie pe gnot): +54-911-666.666.666

di ***
#12**

2 coments On CorseCurteAvrîl#6 – La Bestia

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît