CorseCurteAvrîl#03 – La scomesse

#3 – La scomesse

Te ostarie Uchin, Ustin e Perin a vevin fat une scomesse su la bestie che scuasi ogni sere e jentrave tal pulinâr di Luche e si puartave vie une grasse gjaline.
“Par me al è un martar” dissal Uchin.
“Par me e je la bilite” e fo la idee di Ustin.
“No, e je dome la bolp” al disè convint Perin.
La vitorie te scomesse e previodeve une damigjanute di Clinto, ufierte dal paron de ostarie, Bepi, che al servive il vin miôr de Basse.
I trê amîs no viodevin la ore di risolvi il misteri di chê besteate maladete che e faseve fûr gjalinis di almancul un cuindis dîs di chel frêt Novembar tant che il puar Luche, modest contadin, al veve scugnût comprâ altris gjalinis, stropâ busis e rinfuarçâ la cente dal pulinâr plui di une volte.

La sere daspò, i trê, su licence di Luche, a jerin a fâ la vuardie a turni tal pulinâr. Trê oris di turni ognidun e i altris doi a durmî tal stran de stale dongje. Luche, il paron, invezit al durmive tal so jet su lis plumis e al veve delegât ai trê di risolvi la cuistion e di copâ la bestie cul dopli. Lui nol jere mai rivât a brincâle e nol veve podût fâ luncs turnis lis voltis precedentis. Par chel i leve ben che a fossin in vuaite i amîs.
Viers lis cuatri di matine al tocjà a Perin di sintî i rumôrs. Al viodè doi voi slusints tal scûr e al pontà intor la torce eletriche su la bestie. E veve fat une buse sot de cente dal pulinâr ancje ta chê gnot.
Perin, une volte viodude la bestie, al sbarà ma mancjant il bersai. Al jere plen di terôr parcè che no si tratave di bilitis, martars e bolps. Dut câs la bestie e scjampà vie e no si le viodè plui. Par simpri.
Nissun nol rivà a vinci la scomesse. E Perin, te ostarie, contant simpri la stesse storie cui sgrisui al ripeteve simpri: “Us al zuri, cun chei ongulons e chei dincj a ûs un cenglâr e il music orent, e sameave une robe a miezis tra ors e lôf ma e veve ancje l’aspiet come di un om salvadi! A Diu! A Diu! E jere vignude fûr dal Infier, amîs, o scugni daurman bevi un altri got par dâmi coragjo!”

di Checo Tam (Tapioca City)
#1234