CorseCurteAvrîl#19 – Fals storic

lusôrs di gnot

#19 – Fals storic

Di daûr di chestis frascjis o cjali la situazion. Cul favôr dal scûr o cjapi la decision di tentâ une surtide. Chestis decisions par solit lis cjapi a nâs, fidantmi dal gno istint. Il paîs nol è tant grant e o tachi a movimi torzeonant ator pes cjasis.

O viôt une femine, une vecje, une prede facil e a distance o tachi a talpinâle. Magari là che no son lampions podarès tentâle e se e va drete… Mierde! E je jentrade intun puarton.
Nuie pôre. O stoi fer par un pôc. Alc al sucedarà.

E difat daspò nancje tant timp, di une cort e salte fûr une fantate. No je tant grande e podarès lâmi ben. Mi môf a fîl di mûr e il gno pas si fas plui svelt. Cuatri, cinc metris nus separin, un scat e je fate! Dut a colp un lusôr mi incee. Sturnît cuntun salt mi buti svelt sot di une cise. La machine e va drete e se o soi fortunât, no mi àn viodût. E ancje la frute e je lade pe sô strade e aromai pal moment nol conven movisi di cheste posizion.

Spietant la prossime ocasion mi ven di pensâ che al jere agnorums che chei come me no tornavin di chestis bandis. E se la int di chest paîs e savès che o soi chi, cumò, propit framieç di lôr al vignarès fûr un scjas de madone. Agns indaûr la int e veve une pôre sassine par chei come me e salacor un pôc di timôr e di sugjestion ancjemò le àn. Fasin ben a vêle.

Mi bruntule il stomi. La fam si fâs sintî. O nasi l’aiar e mi rivin i solits odôrs. Simpri i stes savôrs. Ce stufe. Par ogni bon cont salacor par usgnot le vin riscjade avonde. Par cumò tocje sbassâ lis pretesis. Il cidinôr mi fâs capî che o pues movimi.

Mi sa che aromai al è miôr saltâ fûr di chi e tornâ tal bosc. Di chei timps achì un cjavrûl, un cierf o un cjamoç si lu cjate simpri.
Però ce stufadice. Prin o dopo o cerçarai ben ancje alc altri.

di Sporting Brugnul
#1250

1 coments On CorseCurteAvrîl#19 – Fals storic

Lasse une rispueste:

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît